Hende muhé no ta pèrmití mas na universidatnan di Afganistan. Asina e ministerio di enseñansa di e régimen di Taliban a disidí te próksimo aviso. E prohibishon ta konta pa tantu universidatnan públiko komo esnan privá. E paso aki ta sigui otro medidanan ku e gobièrnu nobo di Afganistan a tuma relashoná ku posishon di hende muhé den e pais, ku a mira mayoria di nan libertatnan bai atras bou di e régimen Islámiko di Taliban.
Tambe resien e régimen a duna òrdu na wesnan pa reintrodusí e sekshonnan mas severo di sharia, e lei Islámiko ku ta pèrmití ehekushonnan públiko i kastigu di morto ku piedra. Taliban a yega bèk na poder aña pasá despues di dos dékada di okupashon Merikano.
E edishon mas resien di Curaçao Data Days na Marriott Beach Resort tabata un éksito rotundo. E evento ta forma parti di un serie di konferensha riba digitalisashon i ta organisá pa Smart Nation Curaçao.
Durante e Data Days vários lider den tantu sektor públiko komo sektor privá ta elaborá i hasi presentashon riba e maneranan pa yega na e meta pa transformá Kòrsou den un “digital economy and socially balanced society”.
5W Press a kòmbersá ku bosero di e evento Leonardo de Abreu Ladeira riba e propósito di e serie di konferensha aki.
Despues di 25 aña i temporada e serie popular Pokémon ta bai kontinuá sin su protagonistanan Ash Ketchum i su Pokémon favorito Pikachu. Asina The Pokémon Company a partisipá riba Pokémon.com. Próksimo aña e serie lo tin un otro historia i lo kontinuá ku e trainers Liko i Roy. Tambe lo tin partisipashon di kriaturanan konosí di e game nobo Pokémon Scarlet & Violet.
Den e serie benidero lo tin momentu ku lo para ketu riba e aventuranan di Ash i Pikachu. E promé serie di Pokémon a estrená den 1997 na Hapon. Durante e serie fanátikonan por a sigui kon Ash Ketchum ta realisá su soño di bira e mihó Pokémon trainer den historia. De e último temporada, por fin el a bira kampion mundial.
E plataforma Twitter ta bai restourá tur e kuentanan di periodista ku a haña un blokeo siman pasá. Elon Musk, propietario di e plataforma, a duna di konosé ku el a tuma e desishon aki despues di un enkuesta kaminda el a puntra si mester a eliminá e blokeo.
Siman pasá Musk a blòkia e kuenta di vários periodista ku, manera el a indiká, tabata skirbi riba i kompartí su lokalidat dor di sigui e kuenta @elonjet, un account ku tabata sigui tur movementu di e jet privá di Elon Musk. Vários periodista di agensianan prominente manera CNN i The New York Times a haña un blokeo siman pasá pa motibu ku, manera Muska a argumentá, tantu e komo su famia tabata kore peliger dor di publikashonnan di e periodistanan.
E desishon a resultá sinembargo den basta krítika entre otro for di Nashonnan Uní i Reporters Without Borders, un organisashon ku ta vigilá libertat di prensa rònt mundu.
Awe djaluna ta eksaktamente 50 aña pasá ku e último mishon Apollo pa luna a tuma lugá, ku otro palabra e último biaha ku astronoutanan a bishitá luna. Mayoria hende ta konosí ku e promé mishon ku entre otro Neil Armstrong den 1969, pero de echo Eugene Cernan i Harrison Schmitt ta e último dos sernan humano ku a buta pia riba e ruman chikitu di nos planeta durante e mishon Apollo-17.
Tin sigur 5 mishon a tuma lugá i na total tin sigur 12 persona ku a buta pia riba luna entre 1969 i 1972. No ta sin motibu ku awe ta para ketu riba e dia históriko aki. Pa 2025 NASA a plania otro biahe pa luna ku e programa Artemis, pero ta trata di un proseso mas largu ku tin ku resultá den un biahe pa planeta Mars, pero esaki lo tuma lugá ku tur probabilidat despues di 2030.
E kantidat di mortonan dor di kontagio ku Covid-19 na China ta oumentando rápidamente. E subida di repente aki ta sigui despues ku gobièrnu a disidí suavisá medidanan pa kombatí plamamentu di e malesa. E mayor kantidat di kontagio ta registrá na Shanghai i Beijing.
Outoridatnan a mira nan obligá di suavisá medida despues di un kantidat grandi di protesta den vários parti di e pais den simannan tras di lomba. Segun koresponsalnan di vários agensia di prensa internashonal trahando na China e krematorionan di e pais ta drai konstantemente pa prosesá e kantidat di mortonan. No por otro pasobra frizernan di mortuarionan ta kompletamente yen, miéntras normalmente ta tuma 5 dia promé ku un kremashon òf entiero.
Segun estudionan riba e situashon na China, e medidanan ekstremo di gobièrnu a buta ku hopi Chines no a yega di haña e malesa i pa e motibu ei te ku aworakí masha poko Chines tin resistensha natural kontra Covid.
Siguiendo e informe anteriormente e siman aki riba korupshon den parlamentu di Union Oropeo, entretantu un di e sospechosonan a konfesá di ta kulpabel. Ta trata di e Italiano Francesco Giorgi, kasá di Eva Kaili, visepresidente di Parlamentu Oropeo ku entretantu a keda saká for di funshon. Giorgi a rekonosé ku el a partisipá den pagonan for di Qatar i Marokko.
Presidente di Komishon Oropeo Ursula von der Leyen a anunsiá djaluna ku lo lanta un komishon di étika ku mester kontrolá tur instansha ku ta kai bou di Union Oropeo. Siman pasá a detené sigur kuater persona pa labamentu di plaka risibí for di Qatar i Marokko. Durante entrada polisial a bin topa ku sentenáres di míles di euro ku lo ta proveniente di embahador di Marokko na Polonia, ku posiblemente tambe ta embolbé.
Sospechoso prinsipal den e kaso aki ta keda e polítiko Griego Eva Kaili (riba potrèt), un di e 14 visepresidentenan di parlamentu Oropeo. E pagonan lo ta pa influenshá parlamentu Oropeo na fabor di Qatar i Marokko.
Na Turkia a arestá un periodista pa distribushon di informashon inkorekto riba un kaso di abusu seksual. Segun e korte ku a trata e kaso e notisia a okashoná pániko bou di poblashon. Ta trata akinan di e promé kaso penal kontra un periodista despues di un lei kontroversial ku gobièrnu di Turkia a adoptá resien.
E periodista en kuestion, Sinan Aygül, a publiká un artíkulo kaminda el a bisa ku un grupo di hòmber adulto a abusá seksualmente di un mucha di 14 aña, entre nan agentenan polisial i militar. Aygül a retirá e artíkulo i un mensahe riba Twitter riba e kaso despues, pero el a keda detené finalmente tòg.
Ta asina ku parlamentu di Turkia dos luna pasá a aprobá un lei ku ta fasilitá detenshon di periodistanan ku ta plama desinformashon. Segun presidente Recep Tayyip Erdogan e lei ta nesesário pa defendé siudadanonan. E kastigu por keda imponé pa mas tantu tres aña. Tin krítika ku por usa e lei pa atendé ku disidentenan bou di preteksto falsu.
Nos no ta bai mira e konosido aktor Britániko Henry Cavill mas den e ròl di Superman. Asina Cavill a partisipá riba su kuenta di Instagram. Cavill ta e aktor mas resien ku a hunga e ròl den último añanan pa e kompania Warner. E notisia a kai manera un bòm serka fanátikonan mirando ku den òktober ei mes e aktor a anunsiá ku lo el a sigui hunga e ròl. Cavill no a duna un motivashon dikon e no ta bini bèk.
Den otro fuentenan ta menshoná ku direktor James Gunn ta trahando riba un script nobo pa un pelíkula nobo di Superman. Aparentemente Gunn lo ta trahando riba un vershon mas yòn di e personahe i pa e motibu ei a opta pa un otro aktor. No ta konosí ki dia e próksimo pelíkula di Superman lo estrená den sine.
E fábrika Chines ku ta produsí iPhone, esta Foxconn, ta bai aliviá medidanan pa kombatí propagashon di Covid-19. Asina agensia di prensa Bloomberg a partisipá djaweps. Kolaboradónan por move un poko mas liber i tambe a habri e fasilidatnan di alimento riba e tereno. E fábrika tabata un tópiko kayente durante e protestanan resien na China. E fábrika mester a sera regularmente dor di medidanan di gobièrnu.
Ta parse ku e apelashonnan di e fundadó di Foxconn, Terry Gou kende a atvertí pa e impakto ekonómiko di e medida, a haña oído di gobièrnu di China. E fábrika, kua a keda na Zhengzhou ta konosí tambe komo ‘iPhone City’. Hopi trahadó ta keda drumi na e planta, pero nan no tabata dispuesto mas pa kompartí espasio ku hende infektá. Tambe nan a kuminsá buta trabou abou ora ku e preshon di trabou a oumentá dor di ousensia di koleganan infektá. Aparte di esei tabatin problema ku distribushon di alimento pa e trahadónan.
E seramentu regular di e fábrika a lanta preokupashon tambe pafó di China. Alrededor di 70% di tur iPhone rònt mundu ta keda produsí na Foxconn. Mayoria iPhone 14 Pro i Pro Max ta produsí einan.
Sientífikonan a deskubrí dos planeta nobo ku ta konsistí di mas o ménos 50% di awa, kua ta mas ku nos planeta. Ta trata di e planetanan Kepler-138 c i Kepler-138 d. Nan tamaño ta sigur 3 bes esun di nos. E planetanan a keda deskubrí pegá ku e strea Kepler-138, na un dinstansha di 218 aña di lus for di nos propio planeta. E deskubrimentu a keda publiká djaweps den e revista sientífiko Nature Astronomy.
E sientífikonan a konkluí ku mester ta trata di awa dor ku nan a registrá ku e planetanan ta konsistí di materia mas leve ku piedra, pero alabes mas pisá ku gasnan manera hidrogen (esta waterstof) òf helium. E planeta mas grandi den nos propio sistema solar – Jupiter – por ehèmpel, tambe ta konsistí di gas, miéntras esun di nos ta konistí di entre otro piedra i awa. Pa e motibu ei por lo pronto mester asumí ku nan ta konsistí di awa.
Tampoko no ta probabel ku tin bida riba e planetanan, mirando ku e temperatura midí te asina leu den e sistema Kepler-138 ta mas haltu ku 100 grado Celsius.
E aña aki atrobe Mexico ta e pais mas peligroso pa periodista. Asina Reporters Without Borders (RSF) a duna di konosé den su rapòrt anual (download e rapòrt) òf les’e mas abou. Te ku 1 di desèmber a asesiná sigur 11 periodista na Mexico den e aña aki. E kantidat ei ta representá kasi 20% di e total di periodistanan asesiná rònt mundu.
Na total 57 periodista òf kolaboradó di prensa a pèrdè nan bida, un oumento si kompará esaki ku aña 2021. Segun RSF esaki ta okashoná entre otro pa e konflikto na Ukrania kaminda 8 periodista a pèrdè nan bida. Meskos ku den añanan anterior en partikular Latino Amerika ta e kontinente mas peligroso pa traha den periodismo. Mitar di tur e asesinatonan a tuma lugá den paisnan manera Haiti, Brasil i Nicaragua. Esnan ku ta kubri por ehèmpel krímen organisá, gangs i korupshon ta esnan ku ta kore mas riesgo.
E sifranan ta preokupante: aparte di e asesinatonan 49 periodista a disparsé, a sekuestrá 65 i ainda tin 533 periodista mas detené den sèl pa motibu di nan trabou, di kua na China so tin 110 periodista será. Segun RSF gobièrnunan no ta hasi sufisiente pa protehá nan.
Perú a implementá un estado di emergensha di un luna. Tambe mester tene kuenta ku un posibel toke de keda. Tin bastante tenshon dor di manifestashonnan den e pais despues ku parlamentu a vota pa retirá èks presidente Pedro Castillo siman pasá. Su siguidónan ta èksigí su libertat i un elekshon nobo aworakí mes.
Gobièrnu di Perú di su parti a duna di konosé via e ministerio di defensa ku e estado di emergensha mester buta un fin na vandalismo, violensha i blokeo. En partikular pafó di e kapital di e pais e protestanan ta basta fuerte. Por lo ménos 7 persona a pèrdè nan bida i vários otro a keda heridá durante e protestanan.
Castillo a keda detené despues di su òntslag pa rebeldia dor ku el a purba para e votashon dor di hasi un intento pa disolvé parlamentu pa evitá ku nan lo a bah’é. Su susesor ta èks visepresidente Dina Boluarte kende a hala e fecha pa elekshon dilanti ku dos aña. Pero e simpatisantenan di Castillo no ke esaki.
Sientífikonan na Merka a tuma pasonan importante i yega na logronan históriko den produkshon di energia via fushon nuklear (mihó konosí na Hulandes komo kernfusie). E sientífikonan a logra generá mas energia ku e energia nesesario pa produsí koriente.
Te ku aworakí nos tabata konosí ku fishon nuklear (mihó konosí na Hulandes komo kernsplijting), esta energia a base di radioaktividat proveniente di entre otro uranio. Den kaso di fishon nuklear ta sobra uranio ku no ta produsí energa mas, pero ku ta ketu bai sumamente peligroso pa hende, flora i fauna.
Den kaso di fushon nuklear sinembargo no ta sobra material radioaktivo i por ignorá energia dor di kima kombustibel. Te ku aworakí mester a usa mas energia ku ta keda produsí i pa e motibu ei fushon nuklear no tabata un alternativa realístiko. Si e sientífikonan logra ripití e proseso aki mas frekuente, kisas humanidat ta un paso mas serka di energia limpi, efisiente i duradero.
E por dura un par di dékada ainda promé ku nos ta asina leu i por implementá fushon nuklear di forma komersial, pero indudablemente ta trata di un logro históriko.
Restorantnan na Hulanda no ta tuma reservashon mas pa Pasku. Asina Koninklijke Horeca Nederland a duna di konosé den medionan Hulandes. E aña aki ta pa promé biaha despues di pandemia ku restorantnan por habri kompletamente riba sea dia 25 òf 26. Sinembargo e restorantnan te ainda ta konfrontá ku falta di personal i gastunan haltu.
Pa e motibu ei algun restorant a opta pa no habri Pasku, pero konsekuentemente tur kliente ta buska alternativa dor di kome otro kaminda ku ta haña nan konfrontá ku un demanda muchu haltu pa akapará. Un alternativa segun Koninklijke Horeca Nederland ta pa bestèl kuminda, pero e sektor ei tambe por hañ’e konfrontá ku un demanda muchu haltu durante Pasku.
