5W Press Newsletter #35 2023
Resúmen di tur item di 3 di sèptèmber te ku 9 di sèptèmber 2023
Usuario di smartphone por scroll di artíkulo pa artíkulo tambe.
Curaçao Tech Meetups 2023 – Day 7
Resúmen di Curaçao Tech Meetups 2023 Day 7 resien na Mensing’s Caminada.
Siguiendo e lema “Being smart is also cool!” Mensing’s Caminada a brinda espasio pa aktividatnan edukativo pa mucha den kuadro di Curaçao Tech Meetups. Muchanan por a sera konosí ku teknologianan i sistemanan manera Snapology, Gaming Mechanics, Game Streaming, Virtual Reality i asta ahedres.
Curaçao Tech Meetups 2023 – Day 6
Resúmen di Curaçao Tech Meetups 2023 Day 6 resien na Jan Thiel.
E di 6 dia tabata un anochi spesial pa partisipantenan i invitadonan na Curaçao Tech Meetups 2023 por network den un ambiente ameno i relahá ku live entertainment.
Curaçao Tech Meetups 2023 – Day 5
Resúmen di Curaçao Tech Meetups 2023 Day 5 resien na Banko Sentral.
Riba e di 5 dia di Curaçao Tech Meetups a para ketu riba e tema deep tech, aplikashon i e ròl di arte den tech i retonan di inteligensha artifisial pa ku copyright.
Ramses Petronia di Ofisina pa Propiedat Intelektual (OPI) a elaborá riba e implikashonnan di inteligensha artifisial riba e derechi riba propiedat intelektual. Tambe tabatin presentashonnan di e arkitektonan Chrystal Chavarría i Valery Eshuis riba aplikashon di arte pa konstrukshon via teknologia. Eunice Cijntje a para ketu na e mundu digital ku muchanan ta lanta aden. Nigel Ignacio, propietario di NGAGE / Software Development Consultant, a duna un update riba e último desaroyonan riba merkado di augmented reality.
Lansamentu mishon lunar Hapones te asina leu kanando bon
Hapon a lansa un rakèt ku un teleskop Hulandes na bordo ku mester bai investigá orígen di universo. E instituto espasial Hulandes SRON a kontribuí na e proyekto. Tambe, Hapon kier laga un lander aterisá riba luna.
E rakèt a despegá den mardugá di djarason pa djaweps na e sentro espasial Tanegashima. Mas o ménos 30 minüt despues di lansamentu a deskonektá e teleskop Hulandes pa esaki drenta órbita di nos planeta.
Aki tres pa kuater luna e lander mester yega luna kaminda e lo keda den órbita tres te ku kuater luna mas. Despues lo aterisá e lander riba superfisie di luna. Si Hapon logra, e pais lo bira e di sinku pais den historia ku a logra bai luna.
Korte mas haltu na Mexico ta eliminá prohibishon riba aborto
E Korte mas haltu na Mexico a eliminá e prohibishon riba aborto. Esei ta nifiká ku hospitalnan públiko den hinter e pais mester ofresé e tratamentu aki. Di momentu mas o ménos 10 di e 32 estadonan na Mexico ta ofresé esaki.
E desishon ta nifiká konkretamente ku interupshon di embaraso no ta prohibí mas den e pais, pues servisionan federal di kuido ku ta ofresé aborto no por keda pèrsiguí mas.
Defensornan di derechonan di hende muhe i ser humano ta kontentu ku e sentensha, pero di otro banda tin hopi resistensha tambe. Un mayor parti di e 127 mion habitantenan di Mexico ta katóliko i no ta kontentu ku e desishon.
Danny Masterson kondená na 30 aña te bida largu pa violashon
Aktor Danny Masterson a keda sentensiá na un kastigu di trinta aña te bida largu riba djaweps, despues ku na yüni e aktor Merikano, konosí di e serie popular That ’70s Show, a tende ku e ta kulpabel di violashon den dos kaso. Danny Masterson tabata akusá di 3 kaso.
Sinembargo, hurado no por a yega na un akuerdo pa ku e di tres akusashon. Tres dama, tur èks miembro di Scientology di kua Masterson tambe ta miembro, a akusá e aktor di violashon na su kas entre 2001 i 2003.
Na final di aña pasá, wes a para e kaso pasobra e miembronan di hurado no por a yega na un akuerdo. Pa e motibu ei, ministerio públiko a inisiá un kaso nobo. Masterson semper a nenga tur akusashon. E ta den prisón for di mei, pasobra tabata konsiderá ku e por hui.
Curaçao Tech Meetups 2023 – Day 4
Resúmen di Curaçao Tech Meetups 2023 Day 4 resien na Banko Sentral.
E siman a yega na mitar di su etapa riba e di 4 dia di Curaçao Tech Meetups kaminda organisashonnan lokal a kompartí nan éksitonan. Oradónan manera Geraume Bor (CTO na Ictual), Maria Mensing (direktor Mensing’s Caminada i Snapology) i Vincent van Rutten (Managing Director Sentoo) a splika kon ta krea produkto òf servisio for di nada.
The Rolling Stones lo lansa un álbum nobo riba 20 di òktober próksimo
The Rolling Stones lo lansa un álbum nobo titulá “Hackney Diamonds” riba 20 di òktober próksimo. Esaki ta e promé álbum atrobe den 18 aña. Djarason ora e banda a hasi e anunsio a lansa mesora e single nobo “Angry”.
Den e último simannan tabatin hopi spekulashon tokante un álbum nobo di The Rolling Stones. E antisipashon grandi ta lógiko si konsiderá ku den último dianan por a nota e logo di e banda kasi tur kaminda. Djarason por poko a saka un breaking news ku e álbum a sali kaba.
Mick Jagger, Ron Wood i Keith Richards a presentá nan plan pa un evento huntu ku presentadó Jimmy Fallon. Segun Jagger e banda e graba 23 kansion di kua 12 lo paresé riba “Hackney Diamonds”. Delaster ábum di The Rolling Stones tabata “A Bigger Bang” ku a sali na 2005.
Alphabet, Amazon, Apple, ByteDance, Meta i Microsoft klasifiká komo Gatekeepers
Union Oropeo a klasifiká 6 kompania teknológiko grandi komo entidatnan asina poderoso ku konsumidónan prakátikamente no por evitá nan. Pa e motibu ei e kompanianan aki mester kumpli ku reglanan mas estrikto i manehá nan responsabilidatnan korektamente.
Ta trata di e kompanianan Alphabet, Amazon, Apple, ByteDance, Meta i Microsoft. Komishon Oropeo ta yama e kompanianan aki di awor i dilanti ‘gatekeepers’ pasobra nan ta forma básikamente e entrada prinsipal di konsumidónan na servisionan importante manera TikTok, Facebook, Google Maps i WhatsApp.
Aparte di e 6 kompanianan tambe a identifiká 22 servisio ku ta kai bou di nan ku ta konsiderá inevitabel den bida diário i trabou. Resien e kompanianan a haña mitar aña pa kumpli ku un lista di rekerimentu pa evitá abusu i dependensha di nan. Tambe usuarionan di servisionan importante mester haña mas opshon i libertat den e servisionan nan ku nan kier usa.
Microsoft i Apple no ta di akuerdo ku e klasifikashon aki. Nan ta argumentá ku nan servisionan iMessage (Apple) i Bing, Edge i Microsoft Advertising (Microsoft) no ta kai bao di selekshon di Komishon Oropeo. E kompanianan a apelá e desishon. E dokumento kompleto ta disponibel aki.
Preis di petroli ta baha leve atrobe despues di subida te $90 pa barí
Preis di petroli a registrá djamars e nivel mas haltu den último 10 luna, pero a baha un poko atrobe riba djarason. Un barí di petroli Brent a kosta djamars un tiki mas ku 90 dòler i a kaba siguiente dia na mas o menos 89 dòler. Asina Business Insider ta informá.
E subida di preis di petroli a sigui despues di un deklarashon di e agensia di notisia Saudí, ku a indiká ku Arabia Saudita i Rusia lo prolongá nan limitashon riba produkshon di petroli ku tres luna mas te na desèmber.
E paso aki no tabata antisipá pa merkado mundial. Na kabamentu di aña e produkshon di krudo Saudí lo a keda figo pues na 9 mion barí pa dia pa sigur seis luna. Arábia Saudita a limitá su produkshon di petroli den yüli mas ku otro miembronan di OPEC.
Analistanan tabata spera ku e Saudinan lo a subi nan produkshon di petroli bèk entrante sèptèmber. E prolongashon ta nifiká probablemente un défisit di 1.5 mion barí pa dia nénos riba merkado mundial den último kuartal di 2023. Si no bin un kambio den esaki pa fin di aña e preis di Brent por a subi te na 95 dòler pa barí.
Curaçao Tech Meetups 2023 – Day 3
Resúmen di Curaçao Tech Meetups 2023 Day 3 resien na Banko Sentral.
Riba dia 3 di Curaçao Tech Meetups a para ketu riba e tema ‘mindset’. Kiko ta e mindset na Kòrsou? Mester mehorá esaki? Kon ta hasi esei?
Pa e evento aki a invitá e oradónan Bonnie Benesh, Olga Job, Steven de Lira i Diantha Rodriguez Pereira ku a kompartí nan konosementu i eksperensha ku kambio di mindset. Tambe tabatin performance di spoken word i comedy.
Emishon di gas dañino definitivamente ta afektá sobrebibensha di ber polar
Emishon di gasnan dañino ta afektá eksistensha di ber polar. E ponensia aki ya tabata konosí, pero awor e prueba sientífiko a keda entregá. Investigadónan di Polar Bears International, University of Washington i University of Wyoming a publiká nan estudio den e revista Science.
E investigadónan a logra visualisá e relashon entre emishon di gasnan dañino i e kantidat di dia pa aña ku no tin eis na polo nort. Ya tabatin algun verano kaminda no tabatin eis mas riba polo nort durante zomer. Si e situashon kontinuá bernan polar lo no tin akseso mas na nan presa.
Normalmente ber polar ta kome entre otro foka i walrùs pero dor di e situashon aktual nan mester keda riba tera den e parti mas ekstremo nort di e kontinente Nort Amérika kaminda nan no tin kuminda. Esaki ta afektá futuro generashonnan di ber polar tambe.
TikTok a kuminsá warda dato di usuario Oropeo riba servers na Irlanda
E aplikashon di video TikTok ta bai warda e datonan di usuarionan Oropeo den un datacenter nobo na Dublin, Irlanda. Segun e ret sosial asin’akí e ta den kumplimentu ku reglanan di privasidat.
E regulashon Oropeo ta stipulá ku kompanianan no por simplemente warda dato di hende pafó di Oropa. Esei ta pèrmití solamente si e lei di privasidat di e respektivo pais ta por lo menos mesun severo ku na Oropa.
Anteriormente TikTok tabata warda e datonan di usuarionan Oropeo na Singapur i Merka, pero den e paisnan ei e reglanan di privasidat ta ménos severo. Esei ta nifiká ku tin un posibilidat ku, por ehèmpel, e gobièrnunan ei por pasa dor di dato di hende.
Den e datacenter Oropeo “solamente empleado aprobá tin akseso limitá na sierto dato” di akuerdo ku TikTok. Aparte di e datacenter na Dublin, TikTok ta trahando datacenter tambe na Norwega i un otro sitio na Irlanda. E sede Oropeo di TikTok tambe ta lokalisá na Dublin.
Gresia asotá pa inundashon despues di ola di kandela di mondi
Despues di un par di siman di kalor ekstremo kompañá pa kandelanan di mondi awor vários parti di Gresia ta senario di kaida di awa pisá i inundashon okashoná pa e tormenta Daniel. Te asina leu outoridatnan ta papia di un morto i un persona pèrdí.
Habitantenan di e regionnan afektá mester keda paden di akuerdo ku outoridatnan. No opstante e atvertenshanan di antemano vários outmobilista a subi kaya tòg i keda pegá den nan vehíkulo dor di e nivel di awa ku a subi. E persona pèrdí ta un outomobilista ku a skapa su outo pero despues e forsa di awa a bai ku n’e.
Ta asina ku e nivel di awa di e riu mas grandi den e region ta tres meter mas haltu ku normal. I segun pronóstikonan awa lo sigui kai riba djamars i djarason.
