5W Press Newsletter #13 + #14 2023
Urban Adapters a kuminsá koperashon ku Johan Cruyff Foundation
Riba 1 di aprel último Urban Adapters i Cruyff Foundation a sera un koperashon. Meta di e koperashon ta pa konhuntamente rekoudá fondonan pa e ‘Caribbean Cruyff Sportfonds’.
Cruyff Foundation ta aktivo for di aña 2005 na Aruba, Boneiru, Kòrsou, Saba, Sint Eustatius i Sint Maarten, kaminda tin Cruyff-courts ku ta fungi komo hèrmènt pa aktivá muchanan pa hasi deporte. Tur Cruyff-courts ta establesé komo terenonan seif di enkuentro pa muchanan i hóbenan hasi deporte i hunga. Riba tereno di deporte i wega tin hopi mas trayekto pa desaroyá, i p’esei a lanta e fondo aki.
Na Kòrsou tin aktualmente dos Cruyff-courts, den barionan Mon Repos i Zapateer. E siguiente stap den trabou di Cruyff Foundation na Kòrsou ta konstruí un kancha ku e nòmber di e defensor di Ajax i di desendensia lokal Jurriën Timber. E hungadó di futbòl talentoso aki ta hopi embolbé ku su famia den e proyekto akí i nan ta hopi entusiasmá di por ta den e posishon pa por duna bèk na komunidat.
Cruyff Foundation ta komprometé pa sostené e desaroyo global di proyektonan impaktante di deporte i wega, ku enfoke riba aktividatnan di deporte pa muchanan i hóbenan pa ken deporte no ta opvio.
E meta di Urban Adapters, komo Plataforma di implementashon di projektonan pa Dutch Caribbean Resilient Societies Foundation (DCRSF), ta kore riba mesun liña ku vishon i projektonan di Cruyff Foundation, i p’esei ambos partido ta sumamente eagradesido ku e kolaborashon kual a sera. Loke ta trata DCRSF, su meta ta pa stimulá i fomentá resiliensia den e komunidat di e paisnan Karibense den reino Hulandes i Sürnam, riba area físiko i sosial-ekonomiko. Deporte i transferensia di konosementu ta di gran importansia pa sostene e komunidatnan aki.
Ámbos fundashon ta hasi un yamada na organisashonnan privá i públiko, pero tambe individuonan ku ke duna un sostén finansiero na e Caribbean Cruyff Sportfonds. Tur aporte finansiero ta bon biní. Por tuma kontakto libremente via jcf@urbanadapters.com pa sigui ku e proseso.
Riba potrèt di man robes pa man drechi: Cherryll Prins-Parisius – manager fundraising Johan Cruyff Foundation, Raymond Jamanika – presidente Dutch Caribbean Resilient Societies Foundation, Ellen Jamanika-Van Hoegee – sekretario i tesorero Dutch Caribbean Resilient Societies Foundation.
Kambionan importante den seguridat i “look” di WhatsApp
Tin algun kambio importante na kaminda pa usuarionan di WhatsApp. E app ta bai haña un opshon di siguridat mas fleksibel i e look pa Android ta bai kambia.
Finger Scan pa mensahe individual
Pronto usuarionan di WhatsApp por sigurá sierto kòmbersashon ku un fingerscan. E funshon nobo a sali riba algun vershon preliminar di e app pa Android di akuerdo ku WABetaInfo. Bo por sigurá sierto chat pues dor di tek riba e respektivo kontakto i usa e opshon pa lòk e kòmbersashon. E kòmbersashon ta pasa pa un pantaya separá for di otro kòmbersashonnan.
WhatsApp tabatin un protekshon general kaba ku password, finger print i face scan. E funshon ta hasi su trabou bon, pero e ta nifiká si ku kada bes ku habri WhatsApp, mester hasi e kòntròl di nobo. E opshon nobo pues ta limitá e èkstra molèster ey na e kòmbersashonnan kaminda e ta nesesario. Te asina leu e redakshon di WABetaInfo no a deskubrí nada pa iPhone, pero esei ta kuestion di tempu.
Kòrda por sierto ku for di promé di yanüari di e aña aki WhatsApp NO ta funshoná mas òf a bira instabil riba sierto modèl di smartphone. Pa un lista di e modèlnan bishitá e artíkulo aki.
WhatsApp riba Android ta haña mesun “look” ku iPhone
E vershon Android di WhatsApp ta bai haña un interface nobo basá riba esun di iPhone. E diseño nobo no ta ofisial ainda, pero riba algun vershon beta e redakshon di WABetaInfo a logra spòt algun vershon preliminar.
Lo ta trata di un vershon kaminda mester eliminá algun asina yamá bugs pa despues por lans’é pa usuarionan di Android. Manera ta konosí WhatsApp tin un look diferente riba Android i iPhone.
E nabegashon riba Android lo bai awor via un balki parti abou den pantaya di bo aparato. E pantayanan ta bai bira idéntiko pues, ounke a nota tambe ku e símbolo di ahuste, e asina yamá “Settings”, riba Android a keda igual.
Microsoft i Snapchat ta introdusí filter den Microsoft Teams
Microsoft i Snapchat a introdusí un funshon nobo den Microsoft Teams. Usuarionan por usa efektonan visual awor durante nan meetings online. Asina tin filter opshonal a base di augmented reality, esta imágen èkstra agregá na e grabashon original.
Na total a agregá 26 filter di Snapchat na Microsoft Teams. No ta promé biaha ku e kompanianan ta kolaborá ku otro. Anteriormente Microsoft i Snapchat a uni forsa den e plataforma di enseñansa Flip, ku tambe ta bin ekipá ku filter opshonal di Snapchat.
Tin filter tambe ku ta, laga nos bisa, hasi hende mas yòn. E filternan ta disponibel den e vershon premium di Microsoft Teams, pues e ta disponibel kaba pa kompanianan. Pa skol i uso personal nan no ta disponibel ainda.
Ban Yuda Kòrsou ku Clothing Drive Thru
Dos dama hóben a uni forsa den Ban Yuda Kòrsou i a organisá un bunita inisiativa. 5W Press a kòmbersá ku nan.
The Super Mario Bros. Movie ta registrá mihó wikènt di estreno den historia
Den e promé dianan despues di su lansamentu The Super Mario Bros. Movie, ku ta konta e kuenta di e personahe di Nintendo Mario, a generá mas di 377 mion dòler. Ku e resultado aki e pelíkula animá a kibra vários record. E pelíkula a estrená djarason siman pasá i registrá mesora e mihó wikènt di estreno pa un pelíkula animá den historia. E record anterior tabata pa e pelíkula Frozen 2 ku a generá 358 mion dòler den 2019.
Otro logro ta ku The Super Mario Bros. Movie te asina leu ta e pelíkula mas eksitoso den sine e aña aki. Aparte di tur esei normalmente pelíkula basá riba videogames no ta bende bon.
E stèmnan di Mario i Luigi ta interpretá pa Chris Pratt i Charlie Day respektivamente. Tambe tin aktuashonnan di stèm di Anya Taylor-Joy (Princess Peach), Jack Black (Bowser), Keegan-Michael Key (Toad) i Seth Rogen (Donkey Kong). The Super Mario Bros. Movie ta dirigí pa Aaron Horvath i Michael Jelenic, ku ta responsabel tambe pa Teen Titans Go!.
Erupshon solar a destruí kasi hinter serie di satelit di Starlink
Sientífikonan a deskubrí ku ta un erupshon solar a destruí kasi hinter un serie di satelit di e proyekto Starlink di e kompania SpaceX. Despues ku a pone 49 satelit den órbita, mayoria a bin bèk abou i kima den atmósfera. Asina e revista digital Auto Evolution a publiká.
Riba 29 di yanüari tabatin un erupshon na solo i esei a trese un nubia di proton nos direkshon. E lansamentu di e rakèt pa hiba e satelitnan a tuma lugá un par di dia despues riba 3 di febrüari. Nan lo a bai bula den e nivel ku nos ta yama LEO, esta Low Earth Orbit, e órbita mas abou kaminda nos ta pone satelit.
E nubia ku a bin di solo a hasi e parti mas ariba di nos atmósfera mas diki i ekstendé mas leu. Esaki na su turno a baha e velosidat di e satelitnan ku konsekuentemente un pa un nan a bin abou, kimando den nos atmósfera.
FBI ta atvertí pa no karga smartphone na kontakto di USB públiko
FBI ta rekomendá tur hende pa stòp di karga nan smartphone na puntonan fasilitá na lugánan públiko manera sentro komersial, hotel i airport. Asina e agensia di investigashon a publiká riba Twitter.
Segun FBI hende ku mal intenshon por hack smartphone di siudadanonan ku malware òf spyware via e stòpcontactnan públiko ku konekshon di USB. Ta mihó pa karga e smartphone ku bo propio adapter òf kana rònt ku un power bank. Hackernan lo a deskubrí un manera nobo pa hack smartphone via e puntonan di karga públiko.
Tambe FBI ta atvertí pa tene kuidou ku retnan ku WiFi grátis. Hackernan ta krea retnan falsu tin ora pa sigui tur e aparatonan ku ta konektá na e ret. Di e forma ey nan por hòrta datonan importante for di bo smartphone.
Segun grupo di sientífiko: Olefante Afrikano a domestiká sin influensha humano
Olefantenan Afrikano posiblemente a hasi nan mes mansu sin influensha humano. Un team di sientífiko a konkluí ku e animalnan ta mustra un komportashon komparabel na hende i makaku di e sorto bonobo.
Ora ku animal bira ménos salvage i bira dependiente, di por ehèmpel hende, nos ta papia di domestikashon. E proseso ey ta trese kambio den komportashon i aspekto físiko. Ta e mesun proseso ku a buta ku sierto wòlf a evolushoná i bira kachó, ku entretantu ta hopi dependiente di nos.
Ora un animal domestiká su tamaño ta redusí i tambe su agresividat i instinkto pa yag ta disparsé. Sernan humano i bonobo a pasa den un proseso komparabel: den transkurso di tempu ámbos espesie a adaptá i bira ménos agresivo pa por sobrebibí. Bonobo, meskos ku ser humano, tambe ta tene relashon seksual pa plaser i no reprodukshon so.
Pa bin bèk riba e olefantenan. E sientífikonan a publiká e estudio riba Proceedings of the National Academy of Sciences. Nan a opservá e mesun komportashonnan menshoná. Tambe por nota e kuido intensivo pa e yuchinan i otro miembronan di e grupo.
Por sierto no ta tur sientífiko ta di akuerdo ku e teoria di domestikashon. E proseso di domestikashon no ta notabel serka otro espesie.
T. Rex tabatin djente tòg “basta bon mantené”
T. Rex tabatin djente tòg “basta bon mantené”. Segun un estudio nobo e konosido tyrannosaurus rex (T. Rex) di e époka di dinosourio no tabatin djente asina skèrpi i prominente manera e pelíkula Jurassic Park ta sugerí. E espesie su boka tabatin skama ku tabata tapa e djentenan komparabel ku sierto lagadishi. E resultadonan di e estudio aki a keda publiká den e revista sientífiko Science.
E sientífikonan a investigá un djente di un daspletosaurus, un famia di T. Rex. E djente no tabata duna señal di desgaste, esta “slijtage”. E resultadonan di e estudio ta kuadra ku otro estudionan di djente di T. Rex i otro ehemplar ku ta kai bou di e mesun sorto. Serka krokodel por ehèmpel e desgaste di djente ta bisto dor ku e djentenan ta eksponé konstantemente.
Serka T. Rex esaki no ta e kaso “at all”. Reptil tin karakterístika regenerativo i pa e motibu ey mes ora nan pèrdè djente esakinan ta krese bèk. Serka krokodel e proseso aki ta bai relativamente lihé. Den kaso di T. Rex sinembargo, por a dura sigur un aña promé ku e por a saka un djente nobo. Otro resultado interesante tambe ta ku e djentenan ta hòl meskos ku lagadishi ku ta fasilitá sirkulashon di sanger den lep, karni di djente i nèrvionan.
Hòmber detené pa tene platypus komo maskota
Despues di un búskeda intensivo ku yudansa di públiko polis na Oustralia a logra detené un hòmber ku a fangu un platypus, e animal ku nos konosé tambe komo vogelbekdier. E hòmber lo tabata kana rònt ku e animal den públiko manera un maskota. Pa e akto aki e por konta ku un but enorme di 430 mil dòler Oustraliano, ku ta igual na 285 mil dòler Merikano.
Platypus ta un espesie protegé na Oustralia, pues no ta pèrmití fangu nan pa rekreo personal. E animalnan aki ta hopi sensibel i si tabata trata di un machu, no e hòmber ku a fangu e so, pero tur esnan ku tabata pasa man riba e animal por a keda venená si e bira nèrvioso i ke defendé su mes.
Segun BBC entretantu a laga e animal den libertat atrobe na un riu ku un populashon di mas platypus.
Èks PM di Italia Silvio Berlusconi hibá hospital ku problema na kurason
Èks promé minister di Italia Silvio Berlusconi mester a bai hospital ku problema na kurason. Segun medionan na Italia Berlusconi di 86 aña di edat ta den intensive care na e momentu aki. Berlusconi lo ta bei i kapas di papia.
Segun medionan Italiano ta informá lo ta trata di konsekuenshanan di un infekshon anterior. Siman pasá 30 di mart Berlusconi a bandoná hospital pa loke el a yama un kòntròl di rutina. E polítiko tin te asta un pacemaker na e momentunan aki. Den último añanan e tin problema di salú regularmente.
Di momentu e ta representá su partido Forza Italia den Senado di Italia. Tambe su partido ta forma parti di e koalishon di Giorgia Meloni.
WTO: komèrsio mundial ta bai rekuperá parsialmente den 2023
Komèrsio mundial ta bai drecha den transkurso di e aña aki segun un rapòrt di World Trade Organisation. E organisashon ta premirá un kresementu ekonómiko di 1.7%. E guera na Ukrania i e inkietut aktual den mundu bankario tin un impakto ménos fuerte despues ku China a aliviá medidanan pa kombatí Covid-19.
Segun World Trade Organisation e pronóstiko anterior di 1% ta kai pues un poko mas haltu e aña aki. Aña pasá komèrsio mundial a krese ku 2.7%. Pa próksimo aña ta pronostiká un subida ku 3.2%. Di otro banda mester wak ainda kiko ta e konsekuenshanan di desaroyonan di último tempu manera e guera na Ukrania, e inflashon riba nivel mundial i e impakto di oumento di interes na bankonan sentral.
Funshonarionan di Credit Suisse por lubidá nan bonus den 2023
E funshonarionan mas haltu i managers di Credit Suisse por bien lubidá nan bonus e aña aki. Gobièrnu di Suisa a imponé e medida aki despues ku e mester a intermediá pa un otro banko, esta UBS, por hasi un take-over pa salba e banko.
Sierto manager lo risibí mitar i un kuart bonus respektivamente. Na total e medida aki ta afektá mil trahadó ku ta traha den funshonnan haltu na e banko. Di e forma aki por ekonomisá 61 mion euro. Gobièrnu di Suisa ta investigando kuantu mas por ekonomisá riba e bonusnan.
Luna pasá e banko Credit Suisse a hera di kai den otro despues di un bankrun i retirada di invershonista. Esei despues ku a deskubrí basta iregularidat na e banko. Credit Suisse ta resortá awor bou di UBS, tambe un banko Suiso, ku a kumpra Credit Suisse pa alrededor di 3 mil mion euro. Gobièrnu di Suisa mester a aktua hopi lihé na e okashon ey dunando kasi 100 mil mion euro na garantia pa e take-over por tuma lugá.
Finlandia ofisialmente miembro di OTAN
E miembresia di Finlandia den e Organisashon Transatlántiko di Nort (OTAN) ta un echo. Finlandia ta ofisialmente e di 31 miembro di e aliansa. E seremonia a tuma lugá djamars den presensia di vários minister di asuntunan di eksterior ku a reuní na Bruselas awe pa promé biaha den e komposishon aki.
Presidente di OTAN Jens Stoltenberg a enfatisá e pèrdida polítiko pa Rusia durante su spich. E último pais a reakshoná ku refuerso militar na su frontera ku Finlandia. E miembresia di Finlandia ta nifiká e fin ofisial di e status neutral dje pais. For di segundo guera mundial tantu Finlandia komo Suesia (ku tambe ta den negosiashon pa bira miembro) a opta pa un status neutral riba mapa internashonal.
Pero e invashon di Ukrania aña pasá a trese un kambio den e posishon aki. Básikamente e paisnan ke por apelá riba artíkulo 5 di e statutonan di OTAN ku ta regla ku un atake riba un miembro ta un atake riba tur miembro.
Trump ta paresé den Korte pa tende keho ofisial
Na Merka a detené èks presidente Donald Trump relashoná ku pago pa silensio di e aktris di pelíkula pa adulto Stormy Daniels. El a paresé djamars mèrdia na korte na New York kaminda e mester presentá dilanti wes. Ta promé biaha den historia ku un èks presidente di Merka ta pèrsiguí.
Trump a entregá su mes despues di deliberashon ku fiskal. Eynan e mester a entregá su fingerprints pa despues e tende e keho ofisial kontra dje. Tabata palabrá delantá ku lo no a bui e. Wes a disidí djaluna tambe ku no ta pèrmití kámara den sala di korte.
E kaso kontra Trump ta relashoná ku un pago na Stormy Daniels durante su kampaña elektoral pa e keda ketu riba un enkuentro privá ku Trump. E pago ey sinembargo no a wòrdu registrá manera reglanan elektoral ta stipulá.
Aparte di e kaso aki tin tres investigashon separá ta kana ainda kontra Trump. Unu pa wardamentu di informashon konfidensial na kas, otro pa froude elektoral na Georgia i un di tres investigashon pa su ròl den invashon di Capitol na kuminsamentu di 2021.
Nintendo mester drecha Switch Joy Con Controllers grátis
Si bo ta biba na Hulanda i tabatin problema ku bo Nintendo Switch Joy Con Controllers, awor bo por laga drecha esaki grátis. Nintendo i Komishon Oropeo a yega na un akuerdo pa hasi reparashon grátis di e controller aki, asta ora e ta kai pafó di su garantia. Esaki despues di vários mil keho i preshon di Komishon Oropeo.
For di su lansamentu den 2017 tin keho riba e instabilidat di e Nintendo Switch, ku tabata afektá e gameplay di usuarionan. E problema a keda pèrsistí despues di lansamentu di Nintendo Switch Lite. Te ku awor e prosedimentu di reparashon tabata basta kompliká, asta den e plaso di garantia. Pero awor Nintendo ta komprometé na hasi e reparashonnan grátis, no opstante e kousa.
Pa nos hendenan bibando na Hulanda e notisia por ta interesante. Pa algun tempu kaba tin diskushon riba nivel Oropeo pa kompanianan ofresé reparashon grátis di produkto. Ademas tin muchu produkto ku ta bentá afó dor ku nan durabilidat hopi biaha ta limitá.
Sientifikónan babuká pa piská grabá na 8.336 meter bou di superfísie di laman
Un team di sientífiko Hapones i Oustraliano a keda babuká despues di a graba un piská ta landa na eksaktamente 8.336 meter bou di superfísie di laman. Nunka ántes kámaranan spesial na e profundidat ey a graba e forma di bida aki eynan. E deskubrimentu aki ta nifiká ku sierto piská por sobrebibí na profundidatnan ku anteriormente no tabata parse posibel.
Ta trata di un piská di e sorto Pseudoliparis Belyaevi.
E rèkòrt anterior tabata den 2017 ora a deskubrí e mesun sorto aki na un profundidat di 8.178 meter. E espesie tin hopi interes di sientífikonan. Bida ta práktikamente imposibel dor di e preshon na e profundidatnan aki i pa e motibu ey a fangu dos di nan eynan mes pa mas estudio. Loke ta hasi e espesie mas interesante ainda ta e echo ku e no tin skama sino un kueru moli manera gelatina.
Finlandia ofisialmente miembro di OTAN entrante djamars
Entrante djamars awor Finlandia ta miembro di e Organisashon Transatlántiko di Nort (OTAN). Suesia tambe tabata den e proseso pa bira miembro, pero en partikular Turkia i Hungria ta kontra nan entrada miéntras no kumpli ku algun di nan eksigensianan.
Asina Turkia ta èksigí di Suesia pa ekstraditá 130 Kurdo ku Turkia ta konsiderá terorista, pero e pais ta ninga di hasi esaki. Finlandia i Suesia kier a bira miembro di OTAN pareu, pero despues ku Turkia a kuminsá hasi opheshon pa ku Suesia e paisnan a disidí kontinuá ku un proseso separá.
Tin motibunan práktiko tambe pa e miembresia di partikularmente Finlandia. E pais tin un frontera di 1.340 kilometer ku Rusia. Tantu Finlandia komo Suesia a disidí bira miembro despues di e invashon Ruso na Ukrania. Siguiendo e desishon ey Rusia a a disidí reforsá e region ku militar.
E seremonia di miembresia di Finlandia ta bai kai por sierto pareu ku e di 74 aniversario di OTAN.
Preis di petroli ta subi despues ku OPEC i OPEC+ ta baha produkshon
Preis di petroli a subi konsiderablemente djaluna, despues ku vários pais eksportadó a disidí baha nan produkshon djadumingu. Tantu petroli for di North Sea komo petroli Merikano su preis a subi ku 5%. E miedu a lanta na Merka i Oropa ku e preisnan mas haltu aki ta bai okashoná mas inflashon, ya ku e ta nifiká sin duda ku preis di gasolin ta bai subi.
Paisnan ku ta organisá den OPEC i OPEC+ a anunsiá djadumingu ku nan ta bai produsí 1.1 mion barí ménos pa dia. Segun e paisnan esaki ta pa merkado por rekuperá. Luna pasá e preis di petroli a baha dor di e inkietut ku tin den mundu bankario i riba merkadonan finansiero.
E preis a subi un poko despues, pero no manera Rusia i Saudi Arabia tabata ke. E preis pa bari for di North Sea a sera djadumingu na 84,26 dòler. E preis pa barí Merikano a kaba na 80 dòler pa barí. Merka no ta kontentu ku e paso ku e paisnan organisá den OPEC i OPEC+ a tuma.
