E aktris Merikano Kirstie Alley a fayesé den mardugá di djaluna pa djamars. Asina su yunan a konfirmá riba Twitter. Resien a konstatá kanser serka Alley.
E aktris a haña hopi akohida internashonal despues di su ròl den e serie North and South (1985), un serie riba e guera sivil na Merka. Pero su berdadero breakthrough tabata su ròl komo Rebecca Howe den e serie humorístiko Cheers. Na su pik di popularidat el a partisipá tambe den e pelíkula Look Who’s Talking, huntu ku John Travolta.
Alley a gana vários premio durante su karera, inkluso un Golden Globe pa su ròl den Cheers i un Emmy pa su protagonisashon den e perlíkula David’s Mother.
Twitter tin ku sigui kumpli ku reglanan Oropeo. Si e ret sosial no logra limitá propaganda polítiko, mensahenan di odio i intimidashon e kompania por ferwagt un multa òf te asta un blòk. Asina un komisario Oropeo prominente (Thierry Breton) a atevertí.
Oropa a kaba di adoptá regla nobo pa merkado i servisionan digital pa kombatí desinformashon i odio ku Twitter mester kumpli ku n’e. Asina ya tin akuerdo pa delete tur kontenido ekstremista òf terorista. Na Oropa tin basta preokupashon ku e kantidat enorme di hende ku Elon Musk a kita for di trabou despues ku el a atkirí Twitter. Ku ménos personal ta difísil kombatí mensahenan ku kontenido in aseptabel.
E kompania di biahe espasial SpaceX a lanta un departamentu nobo yamá Starshield, un ret di satélite pa gobièrnu di Merka. Ainda no ta konosí di kuantu satélite ta trata. E satélitenan ta bai traha a base di komunikashon ku laser, kua ta difísil di spia sin ku esaki ta keda notá pa e usuario di e satélite. Di e forma ei por aktua na momentu ku terseronan purba skucha e satélitenan su komunikashon.
SpaceX no ta solamente bai produsí e satélitenan, pero tambe e korespondiente telefònnan ku lo traha via Starshield. E sistema nobo aki lo inkluí tambe luna artifisial ku sensor, ekipamentu pa midi i pa opservashon. SpaceX ya ta usando e ret Starlink, ku ta inkluí alrededor di 3500 satélite. Danki na e ret ei tropanan na Ukrania ainda por komuniká apesar ku komunikashon na Ukrania ta destruí.
E paisnan miembro di OPEC no ta bai adaptá nan produkshon di petroli despues di a baha esaki na òktober. Asina e organisashon a disidí den wikènt despues di un reunion kòrtiku. Promé ku esei tabata antisipá ku limitashon di e produkshon lo a kondusí na preisnan mas haltu, pero produkshon redusí no ta al kaso aworakí.
Apesar di esei te ainda no por antisipá kiko e efekto lo ta riba e preis mundial. Ta asina ku paisnan manera Rusia i Kazachstan tambe ta produsí i eksportá petroli loke tin un efekto adishonal riba e preis. Si nan suministro baha esaki lo afektá e preis internashonal al final tòg.
Ta bin aserka ku mester wak kiko lo ta e efektonan a plaso medio largu di sanshonna ku a keda imponé djaluna riba Rusia. E sanshonnan aki ta inkluí e plafònt di preis akordá djabièrnè pa e paisnan G7 i Union Oropeo. E plafònt ta nifiká ku kompanianan no por partisipá den komèrsio di petroli for di Rusia si e ta kosta mas ku 60 dòler pa barí. Esaki por buta preshon atrobe riba e preis internashonal.
Den òktober e miembronan di OPEC a limitá nan produkshon kaba pa evitá ku e preis lo a baha dimas i resultá den pèrdida.
Vários siudat na Ukrania a bira blanku di rakètnan Ruso riba djaluna. Un gran parti a keda interseptá pa e sistema di defensa na Ukrania, pero esaki no por a evitá daño konsiderabel na siudatnan manera Odesa i Zaporizhzhia kaminda hopi bibienda a keda destruí. Den vários otro parti koriente a kai afó, inkluso e suministro di koriente na Moldavia, pais bisiña di Ukrania. Na Rusia tambe a registrá impakto di proyektilnan Ukraniano.
E konflikto a kuminsá kue formanan basta makabro den paisnan kaminda Ukrania tin embahada, inkluso na Hulanda. Na vários embahada i konsulado a entregá envelòpnan ku wowo di animal òf eksplosivo.
Segun estimashonnan di organisashonnan internashonal Rusia lo tin alrededor di 20% di Ukrania bou di kòntròl, inkluso Krimea. Tur e teritorionan aki te ainda te rekonosé internashonalmente komo teritorio soberano di Ukrania. Entretantu alrededor di 8 mion Ukraniano a buska refugio den paisnan Oropeo for di komienso di e konflikto.
Outoridatnan na El Salvador a detené mas di 140 miembro di gang den ménos ku 2 dia na e siudat Soyapango. E siudat ta rondoná pa mas di 10000 militar i ta kompletamente isolá. E akshon aki ta forma parti di e maneho severo di presidente Nayib Bukele pa kombatí e violensha di gang den e pais. Bukele mes a kompartí e notisia por sierto riba Twitter.
Soyapango ta un lugá pegá ku e kapital San Salvador i ta e lugá mas poblá di e pais. Apesar di e detenshonnan e akshon no a para ainda. Segun minister di Defensa René Merino nan lo no bandoná e region te ora nan a detené te ku e último kriminal. E maneho severo di presidente Bukele ta haña bastante krítika di organisashonnan humanitario. Outoridatnan lo ta hasi detenshonnan arbitrario regularmente.
E forsa aéreo di Israèl a hiba vários atake riba e estrecho di Gaza na Palestina. Esaki despues di un atake proveniente for di Gaza. E agreshonnan a lanta den último simannan despues ku outoridatnan Israelí a likidá vários Palestino. Segun agensia di prensa Al Jazeera sigur 10 persona a pèrdè nan bida durante loke outoridatnan polisial na Israèl a denominá komo disturbio i desorden públiko.
Djabièrnè sinembargo e agreshonnan a bira mas intenso despues di morto di Ammar Mufleh, un Palestino di 23 aña. Mufleh a pèrdè su bida despues ku un agente a tir’e durante un forsageo. E insidente a keda grabá i kompartí bou di Palestinonan loke a resultá den basta konmoshon.
E konfrontashonnan ku a lanta entretantu ta resultando den akshonnan militar. Te asina leu no tabatin un organisashon Palestino ku a claim e atake for di Gaza. Segun Israèl e atakenan aéreo ta dirigí kontra instalashonnan militar.
Durante 8 operashon konhunto di Marina Merikano, Colombiano i esun Hulandes ku a tuma lugá resien a interseptá 9700 kilo di kokaina. E droga tabata destiná pa konsumo na Merka i Oropa i ta kalkulá na un balor di 327 mion dòler. Na total a detené sigur 15 persona di kua no ta konosí na ken nan lo keda entregá pa pèrsiguishon penal. Un di e akshonnan a tuma lugá den e teritorio marítimo di Aruba, kaminda a interseptá kasi 5000 kilo di kokaina.
E aña aki so e outoridatnan enkargá ku vigilansha di kostanan den Karibe a rekohé 109000 kilo di kokaina kaba.
Un dama di e estado Merikano Florida a lanta un kaso kontra e kompania Kraft Heinz. E dama lo ta malkontentu ku e echo ku un macaroni & cheese pa microwave di e kompania ta tuma mas ku 3.5 minüt pa prepará, miéntras e paki ta bisa ku esaki ta e tempu máksimo rekerí pa prepará e produkto.
Na total e dama ta pidi 5 mion dòler di Kraft Heinz pa propaganda engañoso. Segun e dama e kompania no ta bisa ku e konsumidó mester habri e paki promé i agregá awa i e sous di keshi na e macaroni promé ku but’e den microwave. El a argumentá ku pa e motibu ei ta imposibel prepará e macaroni & cheese den ménos ku 3.5 minüt. Si e tabta sa esei lo e no a kumpra e produkto.
Den un reakshon e kompania a duna di konosé di ta na altura di e demanda i ta kla pa bai korte si e dama ke.
Nunka ántes desempleo na Oropa tabata asina abou manera na e momentu aki. Asina agensia di estadístika Eurostat a publiká. Den òktober di e aña aki desempleo Oropeo den promedio a keda kalkulá na 6%, kua ta igual na 12.9 mion Oropeo sin trabou na e momentu aki.
E paisnan ku mayor desempleo ta Gresia ku 11.6% i Spaña ku un porsentahe di desempleo di 12.5%. E desempleo mas abou a keda midí na Repúblika Cheko ku 2.1% i Alemania ku 3%. Hulanda ta pará na di 6 lugá di e lista Oropeo ku un desempleo di 3.7%. Mas aleu por bisa ku den e grupo di persona bou di 25 aña na Oropa 2.9 mion hóben no tin trabou.
New York i Singapore ta kompartí e promé lugá den e top 10 di siudatnan mas karo na mundu. Aña pasá e rekonosementu ei a bai pa e siudat Israelí Tel Aviv ku a sali e di 3 pais mas karo na mundu. Hong Kong i Los Angeles ta kompartí e di kuater lugá. Otro siudatnan riba e lista ta Zürich, Genève, San Francisco, Paris i ku un di 10 lugá kompartí pa Kopenhagen i Sydney.
E datonan aki a keda investigá pa Economist Intelligence Unit (EIU), e divishon di investigashon di e distribuidor Britániko The Economist Group. E investigashon a mustra mas aleu ku den promedio kosto di bida a oumentá ku 8.1% kompará ku aña pasá. E investigadónan ta mustra tambe riba e oumento di balor di dòler, e moneda usá pa kalkulá durane e investigashon.
UNESCO a buta baguette, e konosido pan largu di kushina Franses, riba e lista di herensha kultural mundial. Den último aña Fransia a pidi rekonosementu pa e pan. Segun UNESCO, di kua e sede por sierto ta keda na Paris mes, baguette ta ehemplario pa e kultura i kushina Franses. Segun e Fransesnan e pan ta simbolisá un bon ambiente festivo.
E pan a haña su nòmber aktual den 1920 ora ku Fransia a adoptá un lei ku ta stipulá ku e pan mester pisa pa mas tantu 80 gram i ku un largura máksimo di 40 centimeter. E aña di orígen di e pan no ta eksaktamente konosí. Un teoria popular ta sugerí ku ta emperador Napoleon lo a disidí ku e pan mester un forma largu pa su tropanan por a transportá esakinan mas fásil, sinembargo tin sufisiente evidensia ku e pan lo tabata prepará asina kaba den siglo 17.
Un rekonosementu pa herensha kultural mundial a bai alabes pa e produktornan di ròm na Cuba, ku rònt mundu ta rekonosé pa su típiko produkshon i sabor.
Segun médikonan e resultadonan di un eksperimento ku e remedi Lecanemab ta históriko i prometedor. Lecanemab ta un medisina eksperimental ku segun e estudio lo ta frena e desaroyo di alzheimer konsiderablemente. E médikonan ta enfatisá ku e remedi no ta ofresé un kura definitivo, pero e resultadonan aki ta un paso den e bon direkshon.
E eksperimento a tuma lugá bou di un grupo di 1795 boluntario. Serka e grupo ku a haña e remedi mes (i pues no un placebo) por a nota ku e desaroyo di e malesa a kana ménos avansá. Pues te ainda e médikonan a logra redusí e impakto di e malesa. Sinembargo a nota tambe efektonan sekundario na selebro di mas o ménos 7% di e partisipantenan. Mas aleu 13 partisipante a fayesé durante e eksperimentu, pero lo ta trata di otro komplikashonnan segun e médikonan.
E investigashon a keda risibí ku sintimentunan miksto. Di un banda nunka ántes a yega na resultadonan asina prometedor, pero e riesgonan ta real, segun un médiko ku a papia ku The New York Times, i p’esei mes por dura un tempu promé ku e remedi ta sufisiente safe pa aprobashon.
Karni Kaduká, e obra mas resien di Eligio Melfor a drenta su fase final. E último dos funshonnan lo tuma lugá riba 3 i 4 di desèmber 8or di anochi na Teater Luna Blou.
Karchinan ta disponibel na balor di 35 florin na Mensing’s Caminada, 24 uur uit de muur i na porta di Teatro Luna Blou.
‘Tech giant’ Apple a kaba di anunsiá e mihó apps di 2022 riba su aparatonan. Aki’bou ta sigui un overview di e number 1 apps.
BeReal mihó app riba iPhone
BeReal no ta usa filter òf otro efektonan, pero ta duna un señal na momentunan inesperá pa asina produsí potrèt mas espontáneo. E app a gana hopi popularidat despues di un update kontroversial ku a kambia Instagram den un sorto di TikTok.
GoodNotes mihó app pa iPad
GoodNotes ta konsiderá generalmente un di e mihó solushonnan pa hasi anotashon riba iPad. Den e video aki bo por haña un impreshon di su benefisionan.
MacFamilyTree 10 mihó app pa Mac
MacFamilyTree ta hasi reprodukshon di bo stamboom un aktividat basta adiktivo. Spesial pa usuarionan di Mac ku ke krea un archivo digital di nan famia.
Apex Legends Mobile mihó game riba iPhone
E shooter Apex Legends Mobile a sali e mihó game riba iPhone. Apex Legends ta komparabel ku e konosido Fortnite i ta ganando bastante popularidat bou di gamers.
Moncage mihó game riba iPad
Moncage ta un game spesial pa propietarionan di iPad ku gusta harma pùzel. Segun konosedónan un eksperensha hopi adiktivo.
