Microsoft tabata djaweps pa un momentu asina e kompania mas balioso na mundu, pasando Apple ku for di siman pasá a pèrdè hopi balor riba merkado di bolsa. Invershonistanan ta sképtiko relashoná ku sifranan di benta di iPhone 15.
Akshonnan di Microsoft a subi ku 1.6% loke a buta e kompania temporalmente na un balor di 2.875 bion dòler. Na e momentu ei, Apple tabata na un balor 0.9% mas abou, esta 2.871 bion dòler.
Poko despues e balor di Microsoft a baha atrobe, butando Apple bèk na number 1. Tabata pa promé biaha for di 2021 ku e balor di Apple a baha te bou di esun di Microsoft. E preokupashon ku ta biba bou di invershonistanan a lanta despues ku sifranan di benta di iPhone 15 na China a resultá mas abou ku antisipá.
Tambe invershonistanan ta antisipando riba pèrdida relashoná ku un kaso di violashon di reglanan di konkurensha ku ta andando den korte na Merka. A resultá ku den práktika e konosido Apple Watch no ta kompatibel ku otro marka di smartphone kaminda Apple ta obligá na fasilitá esaki.
Èks presidente di Surnam Desi Bouterse i 4 otro kondenado mester presentá na prison djabièrnè awor. Asina ministerio públiko di Surnam a konfirmá.
Bouterse a keda kondená resien na 20 aña di prison relashoná ku su embolbimentu den e asina yamá Decembermoorden di 1982.
Anteriormente Bouterse i e otro 4 kondenadonan a hasi un petishon pa indulto pero poko despues nan a retirá esaki. Asina e abogadonan di e kondenadonan a hasi vários intento pa drai bèk e sentensia.
E abogadonan a hasi entre otro un apelashon pa apliká un lei di amnestia kontroversial den e pais, pero prokuradó general a rechasá esaki.
E kompania Franses La Poste ta bai kuminsá ku un eksperimento ku un kamber pa pas paña. La Poste ta, manera e nòmber ta sugerí, un kadena di pòstkantor ku ke duna konsumidornan ku kumpra paña online oportunidat pa pas esakinan mesora despues di risibí esaki. Si nan no ta pas, por manda nan retour mesora.
E kompania a nota ku hopi hende ku bin buska pakete ta bin bèk poko ratu despues pa manda e pakete retour. Den práktikamente tur kaso ta pañanan ku no ta pas bon.
Ku e eksperimento aki La Poste ke atraé mas hende tambe pa bishitá pòstkantor, despues ku e kantidat di pòst a kuminsá baha den último par di dékada. Mayoria pòstkantor rònt mundu ta sirbi awendia mas komo sentronan pa manda i risibí pakete.
E representantenan di pakusnan na Paris, kaminda e eksperimento ta tuma lugá, no ta masha kontentu ku esaki. Nan ta teme ku esaki ta bai stímulá mas hende pa bestèl paña online na lugá di bishitá pakus den sentro di siudat.
Plamamentu di desinformashon generá pa inteligensha artifisial ta forma e riezgo mas grandi di momentu. Esei ta e konklushon di Global Risk Report 2024, un investigashon enkargá pa World Economic Forum (WEF).
A plaso largu (esta aki 10 aña) e mayor problema ku nos lo enfrentá lo ta kondishonnan ekstremo di wer. Pero pa próksimo 2 aña lo mester tene koutela ku desinformashon generá pa inteligensha artifisial.
Rònt mundu tin mas o ménos 3 mil mion persona ku ta bai urna e aña aki. Segun e ekspertonan e desinformashon aki por sirbi pa krea divishon i tenshon polítiko ku ta mina prosesonan demokrátiko.
Pa e estudio aki a konsultá mas di 1400 eksperto den maneho di riezgo ku ta mira un oumento den polarisashon rònt mundu. Esei riba su turno por kondusí na destabilisashon di kolaborashonnan internashonal.
E sekuestro di un presentadó di notisia i personal di un planta di televishon na Ecuador a yega na un fin. Un grupo di hòmber ku kara tapá i harmá ku arma di kandela i eksplosivo a invadí e studio djamars durante un transmishon live. E sekuestro a yega na un fin despues ku unidatnan spesial di polis a yega i drenta e studio.
E suseso a tuma lugá na Guayaquil, den parti sùit wèst di Ecuador. Aparte di e atake riba e planta aki tambe a sekuestrá 7 agente polisial na diferente lugá. Tambe a registrá eksploshon na e kapital Quito.
E suseso ta sigui despues ku djaluna presidente di e pais a yama estado di emergensha siguiendo huida di e kriminal notorio Fito for di prison.
Presidente Daniel Noboa ta papia di un guera sivil i a duna òrdu na ehérsito pa intervení kontra e violensha di e gangnan kriminal. E pais bisiña Perú a posishoná tropa na e frontera ku Ecuador relashoná ku e eskalashon di violensha.
Manera tabata antisipá algun ora despues di su lansamentu e promé aterisahe ku un moonlander komersial riba luna lo no tuma lugá. Asina Astrobotic, e kompania ku a hasi e lansamentu, a konfirmá djamars.
Astrobotic a lansa e rakèt ku e moonlander Peregrine djaluna, pero poko despues di despegá ya a detektá problemanan ku e motor. Konsekuentemente e vehíkulo lunar no por move korektamente i bira den direkshon di solo pa karga su bateria. For di e momentu ei ya tabatin duda si e aterisahe riba luna tabatin sintí.
E vehíkulo tin sufisiente kombustibel ainda pa bula rònt i rekohé dato pa transmití bèk. Segun kálkulonan den mardugá di djarason pa djaweps (orario di Kòrsou) esaki lo agotá.
Meta di e mishon aki tabata pa studia e superfísie di luna i rekohé informashon pa un ekspedishon humano den futuro serkano.
Ekonomia mundial ta bai krese ménos fuerte den 2024. Asina World Bank ta premirá den su pronóstiko pa e aña aktual. Esei ta nifiká ku ya pa tres aña ekonomia mundial ta kresiendo ménos fuerte.
Segun e pronóstiko ekonomia mundial lo krese e aña aki ku 2.4% kompará ku 2.6% den 2023, 3% den 2022 i 6.2% den 2021. World Bank ta atribuí e bahada na interes haltu, inflashon kontinuo i kontratempu den ekonomia di China. Konfliktonan den Ost Oropa i Medio Oriente tambe ta influenshá ekonomia.
E parti positivo ta ku e pronóstiko di 2.6% pa 2023 a resultá mitar porshento mas haltu ku World Bank a antisipá. Esaki dor di resultadonan positivo na Merka. Pa e aña aki ta premirá ku Oropa lo hasi mihó ku aña pasá, esta un kresementu di 0.7% kompará ku 0.4% den 2023.
E kontratempu na China si por nifiká problema pa sierto pais di akuerdo ku World Bank, mirando nan dependensha di e komèrsio ku e pais. Pa China ta premirá un kresementu ekonómiko di 4.5% e aña aki kompará ku 5.2% den 2023. Pa próksimo aña ta premirá mas problema ku ekonomia na China. E pais ta pasando dor di un crisis den e sektor di imobilario, ansianidat i e desempleo bou di hóben.
E isla sùit di Nova Zelandia a yama bon biní na un kantidat grandi di foka ku ta okupando kada bes mas espasio riba e isla. Dor di un ola di parto bou di e animalnan tin hopi mas ehemplar ku normal. Ta normal ku durante desèmber i yanüari e animalnan ta haña beibi aserka, pero e aña aki si nan ta parse hopi mas.
Segun e korant The Guardian e animalnan ta paresé den kurá di hende, riba vèltnan di gòlf, bich i kantu di kaminda. Nan no ta parse di tin ku nes ku hende i ta basta fresku, pero problema òf peliger te asina leu nan no ta okashoná.
Habitantenan ta purba adaptá mas tantu posibel na e situashon. Asina nan ta evitá konfrontashon ku kachó dor di tene esakinan paden òf kore outo ku mas koutela. Hende generalmente ta kombibí ku e animalnan pasífikamente for di añanan 90 ora e populashon a rekuperá despues di un ousensia di vários dékada. Esaki danki na un programa intensivo pa konservá e animalnan.
E kompanianan di transporte Maersk i Hapag-Lloyd no a sera a kuerdo ku rebeldenan Houthi pa evitá atake riba nan barkunan den Mar Kòrá. Asina e kompanianan a bisa den reakshon riba informenan ku ta sirkulá riba retnan sosial i den sierto medio di komunikashon.
E website di notisia ShippingWatch ku orígen na Dinamarka a informá anteriormente ku fuentenan den Medio Oriente a konfirmá ku tabatain akuerdo entre e rebeldenan i e kompanianan. Maersk i Hapag-Lloyd sinembargo ta desmentí e informashon aki.
Por lo pronto nan lo sigui evitá e ruta via Mar Kòrá relashoná ku e atakenan di Houthi for di sùit di Yemen. Nan ta nabegando via Suráfrika for di desèmber. Rebeldenan Houthi aktivo den parti sùit di Yemen ta atakando barkunan ku nan ta sospechá di ta transportá karga pa Israèl.
E kompania Merikano di aviashon United Airlines tin vários modelo Boeing den su flota kaminda a konstatá skruf lòs i otro problemanan di instalashon. Asina e kompania a konfirmá den un komunikado na prensa. Siguiendo e notisia Boeing a pèrdè 8% na balor riba merkado di bolsa.
E kompania a laga inspekshoná algun avion di e tipo 737 Max 9 despues ku den wikènt tras di lomba un avion di Alaska Airlines a pèrdè un pida di su ròmpi durante un buelo. Afortunadamente no tabatin hende ku a keda heridá. Siguiendo e insidente e supervisor di aviashon FAA a prohibí buelonan ku e tipo aki inmediatamente.
Alaska Airlines tin 64 avion di e tipo 737 Max 9 den su flota i United 79. Nan ta e úniko dos kompanianan Merikano ku ta usa e avionnan aki. No ta konosí ainda na kuantu avion eksaktamente a konstatá problema.
Di momentu tin mas kòntròl tumando lugá despues ku inspektornan a konstatá ku skrufnan a lòs na un parti usá pa tapa un parti di e ròmpi kaminda por instalá un salida di emergensha adishonal. Dor di e kantidat limitá di stul den e avionnan no ta usa e salida adishonal, pero e piesa aparentemente no ta pega perfektamente.
Esei kasi a resultá den un tragedia durante un buelo di Portland pa Ontario ora e piesa a lòs mei ora despues ku e avion a despegá. Alaska ya pa algun luna kaba a anulá buelonan pa Hawaii, despues ku e sistema di e avion a indiká problema ku preshon di airu den kabina durante e buelo.
No ta promé biaha ku tin problema ku Boeing 737 Max. Den 2019 a registrá sigur 2 aksidente ku e tipo aki siguí pa un prohibishon rònt mundu ku a dura kasi un aña i mei.
Aktris Jodie Foster no ta gusta traha ku hóbennan di e asina yamá Generashon Z, e grupo di hende ku a nase entre 1995 i 2010. Asina e aktris, konosí pa su ròl den “The Silence of the Lambs” a bisa den un entrevista ku e korant The Guardian.
Segun e aktris nan ta partikularmente ferfelu na pia di trabou. Nan no ta yega i kuminsá na tempu òf ta bisa riba un trankil ku nan no tin smak pa traha.
Tambe nan ta deskuidá nan script i ta skirbi di un forma inkomprendibel òf hopi malu den app group i e-mail di trabou. Si e puntra si nan a lesa nan tekstonan bon tambe nan lo ta kontestá masha fresku mes. Segun Foster Generashon Z ta muchu distraí i mester relahá un poko.
Foster tin 61 aña aworakí i konosé e berdadero preshon di e trabou ya ku e mes a lanta for di mucha den e ambiente di sine. Foster a bira konosí den 1976 pa su ròl den Taxi Driver. Despues mas ròl a sigui i tambe el a dirigí i produsí vários pelíkula.
Willis Gibson, un hobensito di 13 aña na Merka, lo a logra komo promé ser humano na mundu pa finalisá e videogame Tetris riba un Nintendo Entertainment System (NES) original. Den un video riba YouTube kaminda Gibson a graba su logro i ku sigur lo generá hopi entrada na views e ta rekonosé ku el a pèrdè tur sintí den su man durante su intento.
Tetris ofisialmente no tin un kabamentu, pero tur konosedó ta na altura ku una bes ku e memoria di e cartridge di e wega yena e game ta crash i ofisialmente a kaba. Den su 34 aña di eksistensha niun usuario di e NES a logra hunga Tetris te na final. Den 2021 so un programa di inteligensha artifisial a logra esaki.
E cartridge di Tetris pa NES ta kuminsá destabilisá despues di 155 level. Willis Gibson a logra alkansá level 157 den 38 minüt i asina crash e wega. Durante su intento el a kibra mesora tambe dos rèkòrt adishonal, esta e rèkòrt pa mas liña kombiná i skor mas haltu pa un ser humano den historia.
Pa hopi aña hende a kere ku level 29 ta e level mas haltu posibel pa un ser humano. A partir di e nivel ei e blòkinan ta bin abou asina duru ku ta físikamente imposibel sigui esakinan di un forma normal. Pero despues algun usuario a deskubrí un tèknika di dede ku ta rekerí hopi práktika, pero ku despues ta hopi efektivo pa kontinuá ku e wega na un velosidat haltu. Asina den novèmber un otro gamer a alkansá level 148.
Kiko ta e téknika pa hunga Tetris na e velosidat aki?
E kompania Apple a pèrdè balor kuater dia konsekutivo riba merkado di bolsa. Asina a resultá na kabamentu di siman pasá. E balor di Apple lo ta bou di preshon relashoná ku un kaso pendiente den Korte na Merka di akuerdo ku The New York Times.
Segun e korant lo tin un investigashon hudisial andando ku entretantu a drenta un fase final. Aparte di esei tin un otro kaso pendiente relashoná ku Apple Watch. E oloshi ta funshoná perfektamente ku iPhone miéntras ku otro marka di telefòn no ta parse di funshoná meskos. Esei a lanta sospecho ku Apple lo no ta kumpliendo ku reglanan di konkurensha.
Analistanan lo a konsehá tambe kontra invershonnan den Apple relashoná ku e benta abou di iPhone 15. E próksimo edishon, iPhone 16, lo no ta masha prometedor pa 2024.
Si Apple no rekuperá e siman aki di e trènt negativo di siman pasá e kompania por pèrdè su posishon di number 1 na mundu komo kompania mas balioso riba merkado di bolsa. Di momentu Apple tin un balor di di 2.800 bion dòler, un suma di 13 sifra. Na di 2 lugá ta bin Microsoft, ku tin un balor di 100 mil mion dòler ménos, esta 2.700 bion dòler.
Un palu di Pasku artifisial masha simpel mes a bai na findishi den Reino Uní pa 3400 pound. Ta trata di un “kerstboom” konstruí 100 aña pasá ku tabatin un balor di 6 pence den 1920.
E diseño di e palu di Pasku aki ta un obra di man ku un altura di 79cm, 25 taki i 6 klèm pa bela. E palu tabata propiedat di Dorothy Grant, un dama ku a fayesé den 2014 na edat di 101 aña i ku a keda usa esaki pa mayor parti di su bida durante temporada di Pasku.
E yu muhé di señora Grant a heredá e palu, pero a disidí bende esaki na findishi. El a keda asombrá ku e kumpradó tabata dispuesto na paga asina tantu sèn pa un diseño simpel asin’akí.
Aktor Vin Diesel, konosí di e serie popular di pelíkula The Fast and the Furious, ta akusá di malkomportashon seksual. Asina e revista Vanity Fair a publiká.
Su víktima lo ta su èks asistente Asta Jonasson, kende tabata traha pa e aktor durante e grabashonnan pa Fast Five na Atlanta. Diesel lo a bai su kamber di hotèl ku e dama den 2010 kaminda lo el a hasi un intento pa abusá di e dama. Algun ora despues di e insidente e dama lo a haña òntslag inhustamente.
Den un reakshon e abogado di e aktor a duna di konosé ku Diesel no ta rekonosé su mes den e akusashonnan. Tambe lo tin prueba ku ta kontradesí e akusashonnan di e dama ku lo a traha no mas ku 9 dia riba e sèt di e pelíkula 13 aña pasá.
