KOMUNIKADO – E Asosiashon di Komèrsio i Industria “VBC” a tuma nota di Gobièrnu su intenshon pa subi salário mínimo. Segun VBC a komprondé e intenshon tabata pa subi esaki ku 58 sèn na sèptèmber último i adishonalmente ku 50 sèn entrante 1 yanüari 2022. Esaki lo nifiká un subida di en total 11.2%.
Realidat ta ku for di medio 2021 preisnan riba merkado mundial a bin ta subi poulatinamente. E inflashon aki a oumentá mas ainda, dor di e invashon di Rusia na Ukraïna na febrüari 2022 i e konsekuenshanan ku esaki a trese ku ne pa preis di krudo i básikamente tur otro produkto riba merkado mundial. Segun nos Ofisina di Estadístika “CBS”, na agosto último e inflashon tabata 5.8%. Segun e último sifranan ofishal, na Merka e inflashon ta riba 8% i na Hulanda riba 16%. Mirando ku nos ta importá kasi tur kos for di exterior, inkluso e inflashon, tin tur indikashon ku nos lo sera 2022 ku un inflashon anual mas haltu ku e 5.8% ku e tabata na agosto último. Tumando e realidat aki na konsiderashon i tambe ku no tabatin indeksashon di e suèldo mínimo na 2020 i 2021 VBC tin komprenshon ku Gobièrnu ke oumentá e suèldo mínimo i ta bai di akuerdo ku esaki, pero e mester bai akompañá ku un flankerend beleid!
Tin algun realidat mas ku tambe mester tene kuenta ku ne.
Pa kuminsá e komersiante tambe ta sinti e peso di e subida fuerte di inflashon riba bida diario di dje i su famia.
Varios negoshi ketu bai ta den “survival mode” despues di e pandemia, kaminda ku nos ekonomia a kontraé (“kremp”) ku 18.4%. Espesialmente negoshinan kaminda tin hopi empleado ku suèldo mínimo ta laborá lo mira nan gastunan operashonal subi drástikamente, ku tur e konsekuenshanan negativo ku esaki ta trese ku ne.
Na 2021 tabatin un kresementu ekonómiko di 4.2% i pa 2022 ta pronostika 5.5%. Pues ainda falta hopi pa rekuperá i neutralisá ful e kontrakshon di 18.4% di 2020.
Dor di emigrashon hopi hende ku tabatin bon forsa di kompra a bandoná Kòrsou i bai biba Hulanda òf Boneiru, hasiendo asina nos merkado mas chikí.
Gobièrnu su propio Ministerionan i konseheronan a bisa Gobièrnu ku e oumento di salário mínimo aki lo (por) tin konsekuensha negativo pa kresementu ekonómiko na 2023. Tambe ta kore riesgo ku desempleo lo oumentá i e oumento lo por pone ku preisnan pa e konsumidó lo subi aun mas tantu. VBC tambe ta hopi prekupá pa e konsekuenshanan no deseá aki.
Ta bon konosí ku VBC ta boga pa tin un kresementu ekonómiko aselerá i duradero. VBC ta firmemente konvensí ku kresementu ekonómiko ta e uniko solushon pa yuda nos sali for di e krisis sosial-ekonómiko ku nos ta aden. Na varios okashon den pasado VBC a trese dilanti ku mester atendé ku nos ekonomia den un forma di krisis. Meskos ku a hasi den pandemia pa atendé ku Covid i manera ta hasiendo awor aki ku salubridad, kaminda a instituí un Regiegroep.
Enfin, apesar di e konsekuenshanan negativo ku e oumentu di salário mínimo por trese ku n’e, VBC ta bai di akuerdo pasobra mester yuda e grupo ku ta sufriendo mas hopi dor di e inflashon devastador aki, pa mantené nan forsa di kompra. Mantenshon di forsa di kompra ta bon pa nos ekonomia. Ta bon pa Gobièrnu realisa sí, ku no ta tur negoshi por akapará e oumentu di salário mínimo, sin haña nan mes den problema finansiero. Den e kuadro aki VBC ta sugerí Gobièrnu enfátikamente pa bini ku un maneho (flankerend beleid) ku ta hasi posibel ku e negoshinan por kumpli ku e oumentu di sálario mínimo, sin haña nan mes den problema i sin tin ku rekurí na outomátikamente traspasá e subida kompletu pa e konsumido. Den esaki ta sumamente importante pa envolví e partnernan sosial den e proseso pa huntu nan yega na un flankerend beleid riba termino kòrtiku i ku realmente lo baha e “cost of doing business”.
Algun ehèmpel di medidanan den un flankerend beleid pa mantené forsa di kompra i redusí cost of doing
business:
Redukshon temporal riba prima sosial ku empleadonan i doño di trabou ta kontribuí ku ne;
Redukshon adishonal temporal di aksèins riba kombustibel;
Redukshon temporal riba gas pa kushiná;
No kobra empleado “bijzondere belasting” ora ku e traha overtaim;
Supsidio temporal riba energia pa personanan ku ta biba bou di e “bestaansmininimum”;
Supsidio temporal riba energia pa empresanan ku tin hopi empleado ku suèldo mínimo den servisio;
Un pago na e minimumloner kual e no ta paga impuesto riba dje i kual e doño di trabou por dedusí for di e OB ku e mester paga;
Modernisashon di lei di retiro pa esaki no mas ta un opstákulo pa tuma hende den servisio;
Subi e “lunchvergoeding” na por lo menos 15 florin, sin kobra impuesto, den kaso di overtaim;
Oumento temporal di huursubsidie;
Oumento temporal di kinderbijslag pa esnan ku ta biba bou di bestaansminimum.
Manera ta konosi, e problema di inflashon ta unu riba eskala mundial i ta rekomendabel pa wak tambe ki medidanan otro paisnan a tuma. Pues konkretamente VBC ta di akuerdo pa e siguiente pakete integral:
subi suèldo mínimo konforme proposishon di Gobièrnu;
huntu ku partnernan sosial yega na un pakete di medida kaminda ta mantené e forsa di kompra di esnan ku ta kobra salário mínimo i na mesun momentu yega na un flankerend beleid pa;
redusí e kosto di hasi negoshi, pa asina sektor privá por kumpli ku e oumento di salário mínimo.
Además, VBC ta propone pa paralelo na e desishon pa subi salário mínimo, pa huntu ku partnernan sosial yega riba termino korto na un akuerdo di prinsipio, kaminda ta hasi e siguiente palabrashonnan:
Establesé un Economic Recovery Board (ERB) den kual partnernan sosial tin partisipashon igual;
Laga e ERB desaroyá medidanan a largo plaso ku ta kontribuí na kresementu ekonómiko duradero;
Realisá un ofisina di planifikashon, sea dentro di un instituto eksistente manera Banko Sentral of otro, ku ta disponé di metodonan di investigashon moderno i instrumentario validá, pa midi e efektonan ekonómiko ku futuro eskohonan of desishonan por tin riba nos ekonomia, por ehèmpel den kaso di un subida di salário mínimo mes.
Brithney Augusta i Dante Marcano ta hóbennan talentoso ku djadumingu dia 6 di novèmber atardi a firma ku Silver Wolves Artist Management, ku e vishon ku esaki ta habri nan kaminda pa subi tarima internashonal. E seremonia a tuma lugá den un ambiente sumamente ameno na Starbucks na Renaissance Hotel.
Silver Wolves Artist Management den kuadro di nan vishon i mishon ku tin énfasis riba avansá talento lokal pa nivel internashonal, a bai di akuerdo pa firma e dos hóbennan super talentoso i pa traha huntu ku nan riba nan karera artistiko lokal i internashonal.
Brithney Augusta tin 16 aña di edat ku un bos manera Kòrsou no a konosé den hopi tempu. E ta un asina yamá “powerhouse singer” manera ta yam’é na inglés, ku ta kanta manera Whitney Houston i Aretha Franklin.
Dante Marcano, di 18 aña ta un hóben ku un bos inigualabel i inolvidabel: un bass/barítono ku un falsetto magestral.
Tur dos tin un presensia riba ensenario komparabel ku dékada di eksperensia. Kòrsou tin asina dos futuro artista di taya na kaminda pa promové nan mes i nòmber di Kòrsou riba tarima internashonal.
Empresario Javier Magdalena i kantante tenor Kadir Snijder a lanta Silver Wolves Artist Management dia 18 di november 2016 i asina a krea e one-stop-shop pa artistanan lokal ku e meta pa lansa artistanan lokal riba nivel internashonal ku un pakete di servisio kompleto.
Ta realmente for di promé paso artístiko di kualke artista, Silver Wolves Artist Management por duna e guia kompleto pa ta un berdadero artista profeshonal.
Siendo un kompania di registro di musíka grabá, maneho di artista i ku ta organisá entretenamentu na nivel, nan ta duna balor na nan símbolo di wòlf ku ta un animal respetá ku nunka bo lo topa ta animá den un sirko. Ta respet’é.
Pronto lo por sigui tende di Brithney Augusta i Dante Marcano kendenan for di awor ta primintí di bai dal pasonan grandi artístiko.
Riba e potrèt por mira di robes pa drechi: Kadir Snijder, Brithney Augusta, Dante Marcano i Javier Magdalena despues di a firma ku Silver Wolves Artist Management.
ORANJESTAD – Awe mainta a continua cu e prome evento internacional di transporte aereo sostenibel, organisa door di Dutch Caribbean Cooperation of Airports’s: – A Flight to the Future – na Hyatt Regency Resort Spa & Casino Aruba. Minister di Transporte, Integridad, Naturalesa y Asuntonan di adulto mayor Ursell Arends, director General di Aviacion y Asunto Maritimo di e Ministerio di Infrastuctura y Administracion di Awa di Hulanda y alabes Presidente di DCCA y CEO di Aruba Airport Authority, Joost Meijs a ricibi e participantenan presente y esunnan cu a atende di forma virtual.
Tema principal durante e prome dia tabata “Discovering the undiscovered focusing on the future of Sustainable Aviation”. E discurso di apertura tabata den man di Jorge Rosillo di Corporación América y CEO di Cargo Terminal of Ecuador, TCE and the Galapagos Ecological Airport, cu ta e prome aeropuerto ecologico di mundo. Rafael Echevarne, Director General di Airports Council International of the Latin America and Caribbean y Marieke Smit, Program Manager Sustainable Aviation na e Ministerio di Infrastuctura y Maneho di Awa di Hulanda tambe a haci un presentacion tocante e roadmap pa e-flight.
Un momento historico durante e evento aki tabata e compromiso cu e ‘Memorandum of Understanding’ (MOU) entre e seis islanan di Caribe Hulandes, Hulanda, e seis aeropuertonan di Caribe Hulandes y Dutch Association of Airports (NVL). E MOU ta empodera principalmente e islanan aki pa explora y establece conectividad aereo accesibel entre Corsou, Aruba, St. Maarten, Bonaire, St. Eustatius y Saba y mas specíficamente pa explora y stimula e uzo di energia emission-free pa por ehecuta conectividad aereo.
Un total di 15 dignitario procedente for di seis isla y Hulanda a firma e MOU y a acorda pa forma un comite di directiva y un grupo di accion cu lo traha un Joint Business Plan tocante con lo por establece esaki. Lo entrega e business plan denter di e siguiente shete luna despues di firma e MOU.
Durante e proximo dianan di e conferencia lo concentra riba diferente tema interesante y importante di sostenibilidad, algun di e temanan principal:
“Built for Experience” enfocando riba turismo sostenibel
“Pushing the limits” enfocando riba e operacionnan pa un aeropuerto sostenibel
“Reality Check” enfocando riba investigacionnan andando y inversionnan
“Connecting Generations” dunando e comunidad un oportunidad pa experiencia e Pipistrel Velis Electro di cerca.
Ainda tin posibilidad pa registra y atende e evento aki di manera virtual cu lo ta transmiti “live” a traves di https://www.dccaairports.com/live-404/ di 7 pa 11 di november 2022. Pa mas informacion tocante e evento y pa por registra participacion virtual, por bishita e website www.dccaairports.com.
Di 12 di novèmber te final di desèmber 2022, Zanolino Gallery & Atelier ta bai presentá un exposishon di arte úniko di Yubi Kirindongo i su amigu i artista Steve Bridgewater.
Yubi Kirindongo, un di e artistanan mas konosí i exitoso di Kòrsou, ta prinsipalmente konosí pa su skulpturanan di bùmper, a pesar ku ela traha ku diferente material durante hinter su karera. Su seri mas nobo, kual e lo presentá durante e exposishon, ta konsistí di artenan hasí di bleki di aluminium den kombinashon ku pintura. E artista un bes mas ta demonstrá su abilidat di transformá un material, ku majoria hende lo konsiderá inutil, den un obra di arte bunita.
A pesar ku Yubi Kirindongo ta konosí komo skulptor, su promé kreashonan tabata pintura. Den añanan 70 ela disidí di tuma arte mas na serio i ela kuminsá su mes atelier den su kas na Den Haag. E atelier pronto a bira un punto di enkuentro pa otro Antiyano ku ambishon artistiko. Un di nan tabata Steve Bridgewater ku a bira un bon amigu di Yubi.
Steve Bridgewater ta un koreógrafo, musiko, bailarín i pintor ku un enfoke fuerte riba arte i expreshon Afrikano i Afro-karibense. Ela bishitá “Koniklijke Academie voor Beeldende Kunst” na Den Haag i e ta dosente di arte na Nilda Pinto SBO. Den e exposishon aki e ta bai exponé un seri di pintura a base di fèrf di zeta.
“Pa ami ta un gran honor pa por exponé mi arte huntu ku Yubi. E tabata un di mi inspirashonan mas grandi i su promé pinturanan a influenshia mi hopi. No ta hopi artista grandi ta saka nan man pa yuda un otro artista subi.”
E apertura di e exposishon lo tuma lugar dia 12 di novèmber 2022 di 4’or pa 7’or di atardi na Zanolino Gallery & Atelier na Pietermaai 33, den presensia di e dos artistanan i ku un opening speech pa kunst historicus Josée Thissen-Rojer. Esaki ta e promé exposishon organisá pa e tim nobo di Zanolino Gallery.
I aunke bùmper di chrome a bira eskaso, Yubi, e “bumperman”, a logra di krea un kolekshon di skulptura di bùmper nobo, speshalmente pa e exposishon aki.
Ku ta p’e, hinter dia e ta den kurá bezeg ku su matanan, anto tòg despues di skol sekundario Siegmar Sophia (1988) ta skohe pa bai studia ingenieria eléktriko. Simplemente pasó no tin un estudio di agrikultura na Kòrsou. Sino e lo tabata sa kiko e lo a hasi. Siegmar tin ocho pa nuebe aña na momentu ku e pone e promé simianan den tera. Esei ta den kurá di e kas ku e ta biba aden na Bándabou. E ta kuida e matanan huntu ku su mama. Siegmar su mama gusta mata ku flor pa wak, pero e mes gusta mata ku bo por kome. Den e añanan ku e ta traha komo mekániko elektróniko i mekániko di ICT, anto toka músika den su tempu liber, hortikultura no ta haña atenshon. Su kurason di kunukero ta bolbe bati den e kas di kultivo ku stròbèri i tomati na Kurá Hulanda Lodge. Aya na Wespen e kasnan di kultivo ta kompletamente outomatisá i tin tur tipo di téknika modèrnu. Einan e ta bin mira kiko tur por – asta den trópiko – na momentu ku bo invertí den kultivo di fruta i bèrdura. Na aña 2015 e ta solisitá na Soltuna, un fundashon di gobièrnu. E por kuminsá traha un par di dia despues. Anto ta asina diariamente e ta hasi loke e ta bon den dje: kuida mata. Esaki ta hasié kontentu. E ta un hende felis. E ta traha na e kasnan di kultivo i e bibero di Soltuna. E siguridat di un salario tur luna, ta duné trankilidat. Pero Sophia ta soña. E ke logra mas kos i e ke deskubrí kos nobo.
Filosofiá mei-mei di e matanan (e kunukero na palabra)
“Mi gusta tur aspekto di e trabou akí. Sembra, kambia di pòchi, fertilisá, muha. Pero loke mi gusta mas tantu ta kosechá. Bèrdura i fruta. Ta e ora ei bo ta mira e resultado di tur esfuerso. Hepa! Waw! Na e momentu ei mi ta sinti mi super kontentu. Semper mi ta alegre, pero manera tur hende, ami tambe ta karga mi tristesa. Mi no ta gusta papia tokante esei. Ta mi dolor, anto mi no ke horka otro hende ku esei. Mi ta keda ku mi dolor, den mi. Aki na Soltuna mi a siña pa traha den un tim. Tur e diferente karakternan, bo mester haña un manera pa dil ku esei.”
“Mi por ta mi so bon bon. Asina mi ta. Na kas ku mi mes matanan. Mi tabatin porko i galiña tambe. Mi a slaktu eseinan i parti ku famia i amigunan. Mi gusta kushiná i skucha músika. Sali? Ai nò! Mi ta preferá lesa un bon buki. Na ingles, spañó òf hulandes. Bo por ta e protagonista. Pa un ratu. Sinti loke e ta sinti. Si ta un historia di amor, ai, tin biaha mi ta asta yora. Mi sa wak televishon òf hunga un wega riba telefòn. Pero mi ta fada lihé.”
“Ora mi ta trahando asina, mi ta pensa riba tur kos. Hinter dia mi ta pensa. Mi ta wak un nèshi fruminga i mi ta mira kon e bestianan ta dil ku otro. Mi gusta studia nan. Na un momentu asina…yen’i pregunta ta pasa den mi kabes. Tin otro ser ku nos no ta mira? Ken ta wak nos? Mi a lanta katóliko. Pero religion ta hasi katibu mental di hende. Ya komo e ta imponé kiko sí i kiko nò tin mag. Loke bo mester hasi. Ta importante sí ku bo tin un base. Katolisismo ta mi base. Pero pa mi kreensha ta libertat, energia. Esei bo ta mira ora por ehèmpel bo ta duna un mata awa i bo papia òf kanta algu. E ora ei e ta inkliná su mes na bo. Wak pa bo ripará! Ta kon esei ta funshoná, mi no sa. Pero ta asina ta.”
“Mi ta spera ku un dia mi lo tin mi mes negoshi. Esei ta mi soño. Pero promé mi mester haña un tereno. Anto ta esei ta e kos. Tur kaminda bo ta tende ku nos mester kultivá mas nos mes. Pero ora bo buska finansiamentu i guia, no tin niun hende pa yuda bo. Si bo no sa ta kon bo mester skirbi un plan di maneho òf un businessplan, ta kon bo ta bai haña un tereno? E ora ei bo no por hasi nada. Ta p’esei Kòrsou no ta bai dilanti. No ta trata di ami so, mi ke yuda otronan. Mi mes a pasa un tempu sin trabou. Mi no por a haña trabou. Ta hopi biaha a rechasá mi. Pero aki na Soltuna mi tabata bonbiní.” “Bo no mester dependé di pakete di kuminda. Si mi haña un tomati di un hende, mi ta habrié i mi ta saka e simianan fo’i dje. Mi ta sembra nan pa mi haña mas tomati. Kiko mayoria di mucha na Kòrsou ta hasi? Bo ta duna nan un florin i nan ta gast’é na mangel. Nan no ta spar. Nan no a siña pa spar. Kai i lanta para, klaro! Ta esei bida ta. Bo ta siña di eror ku bo a kometé. Kos bon ku mi a pasa aden, mi ke pa otro hende tambe pasa aden. Mi ke kompartí konosementu i eksperiensia. Pasó nos por. Nos por manehá un kompania. Nos no mester trese hende for di eksterior pa esei. E kos ta ku nunka nos a siña esei.”
Riba e tereno di Soltuna na De Savaan tin kas spesial pa kultivá bèrdura i fruta aden. E konstrukshon ta protehé e matanan kontra bishita indeseá manera insekto, lagadishi, yuana pero tambe ladron. E plèstik i paña di waya spesial, ta krea sombra riba e dak. Nan ta tene e rayonan di solo kayente pafó. Danki na e klima den e kasnan akí e vegetashon tin mester di ménos awa i mèst. E temperatura sa subi te 34C. Por ehèmpel promèntè pika, promèntè, kòmkòmber i bèrdura bèrdè ta krese bon den un ambiente kayente i húmedo asina. Soltuna ta konektá na e instalashon pa purifikashon di awa di Klein Hofje. E awa ta wòrdu di pòmp na De Savaan i aya ta ward’é den un depósito. Via di pipa e ta bin te na e matanan den e kas. Anto pa mèst, ta usa e sistema ku ta usa rònt mundu esta e téknika di venturi. E diámetro di e pipa ta baha na momentu di entrada i subi ora di sali. E velosidat di e choro i e bahada di preshon ku ta surgi – pa medio di un konekshon lateral – ta pèrmití pa inyektá líkido manera mèst. E mèst líkido ta wòrdu chupá dor di e sistema. E awa di Klein Hofje ta resiklá i tin basta nutriente. Ta p’esei no ta nesesario pa agregá mashá na e awa akí. Pafó di e kasnan di kultivo tin espasio pa e vegetashon ku tin mester di mas solo. Manera pampuna i papaya. Si ta trata di kultivo den kas òf pafó mester paga tinu! Kon e blachinan ta? E tronko? Tin algun malesa? Algu ta bai robes? E ora ei bo mester sòru pa bo ta na tempu.
Kamber di bebi pa mata
Sophia ta traha den e bibero tambe. Aya bo ta haña e matanan yòn. Den baki. E bakinan ta den rei, hopi rei. Méskos ku mucha chikí, e ‘bebinan’ akí tambe ta pidi hopi atenshon i kuido èkstra. Mainta tempran – basta ta promé ku dies or, ora ku ainda no ta hasi kalor – empleadonan di Soltuna ta duna e matanan awa ku un spruier. Nan ta duna e matanan den baki, awa di kranchi. E awa di kranchi akí no tin sufisiente nutriente. Esun di Klein Hofje sí. E matanan tin mester di nitrógeno, fòsfòr i potasio pa nan krese saludabel. Si e kondishon di e matanan bai atras, ta drecha esaki agregando fertisilante i vitamina na e awa. Sophia i su koleganan ta drùk ta planta, transplatá, duna mata awa i mèst, anto kambia mata di pòchi. Banda di esei semper tin kos di hasi den mantenshon. No tin dos dia méskos den hortikultura!
Dia di mata
Den e bibero simia ta krese bira mata yòn saludabel. Un parti di esakinan ta bai hortikultor na Kòrsou mes. Despues di mas o ménos sinku siman nan ta risibí nan pedido di mínimo 48 mata. Soltuna ta konosí mas tantu pa su ‘dia di mata’. Tradishonalmente ta kada tres luna, riba e di lastu djasabra di luna. Riba e dia ei tur ku ke, por kumpra un òf mas mata na Soltuna. Ta manera ta fiesta tin! Semper tin mas ku shen bishitante! Di e manera akí e fundashon ta yuda esnan ku ke kosechá fruta i bèrdura na eskala chikí na kas. Alabes e dia ta kontribuí na konsientisashon. Skohe produktonan lokal realmente por hasi un diferensia. Pasó si konsumindó lokal kambia masalmente pa kumpra i kome kuminda lokal, e sektor agrikultor por krese i sigur asta dupliká su produkshon.
Dependé di e pedido Soltuna, ta kultivá un gran kantidat di vegetashon riba e tereno, den e kasnan di kultivo i e bibero. Algun di e bèrduranan ta: promèntè pika, tomati grandi i chikí, kòmkòmber, yambo, sèldu, pitiseli, kòusebant, antrua, berenhèin, salada, kolo chines, paksoi i pampuna. Nan tin e siguiente yerbanan: rósamarèin, lamúngras, orégano, yerba di hole, kanéleblum, dile, tèim, menta i gèmber. Tambe tin fruta manera lamunchi, parchita, skòpapel i bakoba.
Kolektamentu sentral
Un di e tareanan núkleo di Soltuna ta pa kolektá e produkshon di bèrdura i fruta na e isla i hiba esaki na e supermerkadonan. Riba djaluna, djárason i djabièrnè e kunukeronan ta bin entregá nan produktonan. Ta pisa i pone nan kla pa parti nan den e trùknan. Despues ta entregá esaki, den kua e kosecha di Soltuna mes tambe ta aden, na esnan ku a hasi pedido. E idea tras di e kolektamentu sentral akí ta pa palabrá mihó preis i areglo di pago ku e supermerkadonan i minimarketnan. Ta importante ku mas tantu kunukero ta djòin pa duna e sektor mas siguridat pa loke ta trata produkshon i entrada. Di e manera ei e kunukero por konsentrá kompletamente riba su punto fuerte: kultivo.
Na 1973 a lanta Stichting Ontwikkeling Land- en Tuinbouw Nederlandse Antillen (Soltuna) ku meta pa desaroyá sektor agrikultor na e islanan. Na nòmber di gobièrnu Soltuna ta manehá mas o ménos 40 hèktar di tera di kultivo. For di ougùstùs 2022 Pieter van Baren ta direktor di e fundashon. Soltuna tin sinku empleado fiho i algun temporal. Pa motibu di bùdjèt na e momentu akí, e fokùs ta maneho i mantenshon di e terenonan, kosecha di bèrdura i fruta na eskala chikí. Pero Van Baren lo ke bai mas aleu. E ta pensa pa duna entrenamentu i kurso na kunukero i na futuro hortikultor. E ta haña ku si Soltuna risibí mas supsidio e lo por hunga un ròl signifikativo. E fundashon por yuda e sektor ku programa enfoká riba sembra i kosecha di produkto i ayudo pa un parti di e atministrashon. Soltuna ke bai dilanti i krese pa ta un bùfer seif riba dos tereno: preis hustu pa konsumidó i garantia di komestibel pa gobièrnu.
E kompania doño di Facebook Meta ta pensando di kita míles di trahadó for di trabou. Esaki segun The Wall Street Journal a base di fuentenan den e kompania. Segun e website lo partisipá e promé buèlta di ontslag djarason awor.
Meta lo tin pronóstikonan poko faborabel. E kompania a haña kompetensha di otro retnan sosial manera TikTok. Otro problema pa Meta ta e maneho nobo di privacy di Apple. Dor di e kambio aki Meta no por bende advertisement dirigí mas, perdiendo asina basta entrada.
E kontrakshon ekonómiko di momentu tambe ta impaktá e kompania i e gastunan di Metaverse ta enorme. Metaverse ta un proyekto di propietario Mark Zuckerberg pa krea un mundu virtual kaminda usuarionan por hasi hopi kos for di kas. E plannan aki a resultá den un kaida den kompra di akshonnan di Meta ku a pèrdè kasi 500 mil mion (un montante di 11 sero!) na balor di bolsa e aña aki.
Vários otro kompania ta kòrtando den personal. Asina Twitter a eliminá 3.700 kupo di trabou siman pasá.
E kompania Apple ta pronostiká ku ta bai tin ménos iPhone 14 disponibel riba merkado dor di produkshon redusí. Segun agensia di prensa Bloomberg esaki ta okashoná pa un parti pa e demanda redusí di iPhone 14. Pero aparte di esei un fábrika grandi na China ta será dor di propagashon di Covid-19. Esaki tin un impakto grandi riba produkshon di e aparatonan i retraso den disponibilidat.
Apple tabata konta ku produkshon di alrededor di 90 mion iPhone 14, pero esaki a keda adaptá na 87 mion. Aparentemente konsumidornan ta wak pa alternativanan mas barata.
Pa loke ta trata e produkshon mester konsiderá e vários lockdown na e siudat Zhengzhou. Esei ta afektá e sentro di produkshon mas grandi di Apple. Einan ta produsí alrededor di 80% di e modelonan di e iPhone 14. E fábrika no ta drai na su kapasidat máksimo na e momentu aki.
Sigur 38 persona a keda heridá dor di un kandela na e siudat New York riba e isla Manhattan. E kandela a tuma lugá den un edifisio kaminda e bateria di un basikel eléktriko a kue vlam i sigui plama. Segun e hefe di bomberonan ya tin kasi 200 kandela okashoná pa baterianan ióniko ku ta konsistí di entre otro litium.
E korant The New York Times a skribi ku tabatin sigur 5 baiskel eléktriko presente riba e di 20 piso kaminda ta prohibí subi ku baiskel.
Habitantenan di Reino Uní ta bai haña 1 dia liber èkstra próksimo aña riba 6 di mei. Esaki relashoná ku koronamentu di prens Charles III. Djaluna 8 di mei ta bira un dia di fiesta. Charles su mama Elizabeth a fayesé riba 8 di sèptèmber último. Charles ta fungiendo di momentu komo rei, pero e berdadero koronamentu ta un proseso ku ta tuma tempu.
Asina a koroná Elizabeth riba 2 di yüni 1953, miéntras su kasá George VI a fayesé den febrüari di 1952. Na e okashon ei tambe tur siudadano a haña un dia liber èkstra. E intenshon di e dia liber ta pa siudadanonan por organisá nan propio festividatnan lokal rondó di koronamentu.
Na Alemania outoridatnan enkargá ku protekshon di mucha a reskatá un mucha muhé di 8 aña ku tabata será den kas di su abuelonan kasi hinter su bida. E deskubrimentu a tuma lugá na e pueblo Aleman Attendorn. Outoridatnan a mobilisá despues di a haña un tep anónimo.
Segun agensia WDR na Alemania e mucha lo a sali bai pafó pa último biaha ora e tabatin un aña i mei. E mucha por lesa i skirbi, pero su mama lo no tabata ke pa e tin kontakto ku otro mucha. Mas aleu e mucha no tabata mustrá señal di maltrato físiko òf falta di nutrishon.
No ta konosí ta kiko a motivá e mama. E último aki i e abuelonan a keda ketu for di moment ku outoridatnan a aparesé. Nan tur tres ta sospechá di robo di libertat di e kriatura. E mama a logra tene e situashon sekreto tur e añanan aki dor di informá outoridatnan ku el a muda pa Italia. Ora e pais a desmentí ku e dama i e yu ta biba einan, outoridatnan a start un investigashon. Lo ta trata di un kaso kaminda e mayornan tabata den korte pa supervishon di e mucha.
Na Tanzania 19 persona a pèrdè nan bida dor di un aterisahe di emergensha di un avion den Victoria Lake. Asina agensia di prensa Reuters ta informá. Ta trata di un avion di e kompania Precission Air, e kompania privá di aviashon mas grandi na Tanzania.
E aksidente ta okashoná pa mal tempu. E pilot di e avion lo a purba aterisá riba pista di un aeropuerto pegá ku e lago. Na total tabatin 39 persona i 4 tripulante riba e buelo. Sobrá pasahero a keda reskatá dor di piskadónan i timnan di reskate ku a yega na e sitio despues.
“Black Adam” di Warner Bros. / DC tabata ketu bai pará na number 1 na box office un wikènt mas promé ku lansamentu di “Black Panther: Wakanda Forever” djabièrnè último. Asina e website The Wrap a publiká. Ku e logro aki “Black Adam” a generá $18.5 mion riba nivel lokal butando e resultado total na $137 mion despues di tres siman.
Sinembargo tin problema ku lansamentu di e pelíkula na China, loke por resultá den e mesun problema ku e pelíkula di Marvel “The Eternals”. Den total último título ei a alkansá e mesun montante aña pasá riba nivel doméstiko. I “Black Adam” ta parse di alkansá $164 mion riba nivel doméstiko i $400 mion riba nivel mundial.
