Aktor Daniel Radcliffe, konosí pa su ròl komo Harry Potter, no ta kere ku su partisipashon ta nesesario pa hasi e serie aktual rondó di e mesun personahe un éksito. E ta kontentu ku otro hende ta karga e batuta. Den un entrevista ku e revista ComicBook el a indiká ku e ta kontentu manera kosnan ta. Daniel Radcliffe a hunga e ròl di e mago di su 11 te ku su 21 aña.
Manera ta konosí resien a anunsiá un serie basá riba e mesun pelíkulanan di Harry Potter ku nos konosé kaba ku un cast nobo. E serie lo bai stream riba MAX, e servisio di streaming di Warner Brothers. Kada temporada lo kubri un buki. E plan ta pa e serie bai kana i kubri 10 aña largu.
Pronto e kompania Meta Platforms ta bai lansa Threads, un app ku mester kompetí ku Twitter. E app lo ta disponibel entrante djaweps 6 di yüli riba App Store di Apple. Threads lo ta akoplá na Instagram pa asina usuarionan por pasa nan siguidónan riba Instagram pa e app nobo. Di e forma ei usuarionan no tin mester di krea un “following” nobo.
E reakshonnan den prensa lokal i internashonal riba e disturbionan na Fransia ta hopi dividí. Tantu e manifestantenan komo polis ta haña falta di e agreshonnan. Esnan responsabel pa e destrukshonnan ta tilda polis di rasismo i violensha struktural.
Alabes tin mas di 350 mil euro na donashon a drenta pa famia di Nahel, e hóben di 17 aña ku polis a tira mata despues di a ninga di para su outo durante un pèrsiguishon basta peligroso. Famia di e agente den e kaso aki tambe a risibí hopi donashon, un suma total di 1.4 mion euro pa ta eksakto di hende ku ta aprobá aktuashon di polis.
E disturbionan ta asina agresivo ku presidente Emmanuel Macron a reuní ku vários alkalde di siudat pa eventual medida. E alkaldenan lo a indiká ku e situashon aki no ta algu nobo, ta trata di hóbennan ku ta biba den e asina yamá “banlieus” kaminda tin hopi hende ku poko entrada. Den 2005 tambe tabatin protestanan komparabel despues ku sospechosonan a muri durante un pèrsiguishon.
E alkaldenan ta dividí: algun ta proponé medida severo, miéntras otronan ta sugerí pa restrukturá polis. Pero ta problemanan ku ta pèrsistí pa vários aña kaba. Mester bisa ku e último dos mardugánan tabata relativamente trankil.
Entretantu e daño di e disturbionan na Fransia ta kalkulá na 280 mion euro…
Organisashonnan pa bienestar di animal ku ta operá na Kòrsou a entregá un lista na Promé Minister Pisas ku 11 mil firma bou di un petishon pa no ehekutá un plan di Dierenbescherming pa rekohé kachó di kaya i mata esakinan. E organisashonnan a aserká gobièrnu pa papia riba plannan alternativo.
Despues di tin 2 aña mará kaba na Santa Barbara poko poko pero sigur e réplika di Santa Maria por kuminsá risibí públiko. Nos tabata presente ora ku Glorieux College a hasi un bishita pa haña un introdukshon den e biahe ku Cristóbal Colón a hasi di Oropa pa Karibe den 1492.
Den parti nort di Italia a logra reskatá un dama despues di 36 ora for di un kueba. Ta trata di un eksplorador konosí na Italia ku a kai for di un baranka te na un profundidat di 150 meter. E pia di e dama ta kibrá dor di e kaida. Su kompañeronan a notifiká outoridatnan mesora.
Alrededor di 60 trahadó di reskate a yuda pa reskatá e dama i ku a transport’é despues pa hospital. Ta trata di un region ku un paisage basta inaksesibel loke a difikultá e trabounan. Segun último informashon e dama ta bayendo bon i ta rekuperando den hospital.
Tin krítika fuerte di partikularmente China i Sur-Korea riba e plannan di Hapon pa laga awa proveniente di e reaktor na Fukushima kore bai laman. Esaki apesar di aprobashon di International Atomic Energy Agency di Nashonnan Uní ku ta konsiderá ku ta safe pa laga e awa kore bai laman.
Segun China i Sur-Korea esaki por resultá den daño na medioambiente. Mas aleu e paisnan ta argumentá ku tur pais embolbé den e region mester ta embolbé den e afan. E protestanan di China i Sur-Korea por konta ku sosten di organisashonnan di piskadó Hapones ku tambe ta preokupá ku e efektonan riba bida den laman. Nan ta mustra entre otro riba e periodo despues di e desaster di Fukushima den 2011 ku a resultá den ménos importashon di alimento for di Hapon.
International Atomic Energy Agency a kondusí un investigashon 2 aña largu i a konkluí finalmente ku ta safe pa laga e awa di e reaktor kore bai laman. E plan di gobièrnu di Hapon pa laga e awa kore bai laman ta forma parti di trabounan pa desmantelá e planta nuklear. No ta konosí ki dia e pais lo ke realisá e plan. Ta trata di mas di 1 mion tòn di awa kontaminá ku lo deshasí di dje durante un periodo di 30 te 40 aña.
Entrante 1 yanüari 2024 alumnonan na Hulanda mester tin un motibu bálido si nan ke tin nan telefòn den klas. Asina entre otro NOS ta informá. Ministerio di Enseñansa ta bai presentá un konseho urgente pa esaki di akuerdo ku un karta di minister Robbert Dijkgraaf. Despues di e temporada di fakansi aki dosentenan, alumnonan i nan mayornan mester yega na un sistema pa kada skol.
E prohibishon di telefòn den klas ta un tópiko di diskushon pa basta tempu kaba na Hulanda. E ministerio di enseñansa Hulandes ke tuma e paso aki pa asina mehorá resultadonan na skol i pa tin ménos distrakshon den lès.
E medida no ta konta pa telefòn so. Tablets i smartwatches no ta wèlkòm mas den klas tampoko. Telefòn ta pèrmití solamente ora ku e lès ta rekerí uso di telefòn òf si tin un motibu médiko. Na kabamentu di próksimo aña eskolar mester evaluá kon esaki a bai i kiko ta e efektonan.
Sientífikonan a deskubrí olanan di sonido den espasio okashoná pa un choke entre dos black hole na un distansia konsiderabel for di nos. Esaki por ta promé biaha ku ta registrá kreashon di un black hole nobo.
Manera ta konosí black holes ta forma e sentro di un sistema solar i ta konsistí di materia ku un forsa di gravedat asina fuerte ku nada pegá ku e materia aki no ta skapa.
E choke entre e dos ophetonan enorme aki ta asina fuerte ku nan por kambia espasio i tambe tempu. Di momentu sientífikonan ta investigando kiko ta e otro efektonan di e fenómeno spektakular aki.
Apple ta e promé kompania Merikano den historia ku a alkansá un balor di 3 bion dòler ($ 3.000.000.000.000) riba merkado di bolsa. Pa algun tempu kaba e balor di akshonnan tabata aproksimando e rèkòrt aki. E aña aki e balor di akshonnan di Apple a subi ku 49%, kua ta nifiká ku for di 1 di yanüari e balor di e kompania a subi ku 984 mil mion dòler. Djabièrnè ya e balor a pasa e 3 bion, serando na 3.052 bion dòler.
Otro kompanianan di teknologia manera NVIDIA tambe a alkansá un balor di 1 bion dòler. E balor di bolsa a subi ku 3.6% danki na invershonnan den inteligensha artifisial. Netflix su balor a subi ku 2.9%, miéntras Meta Platforms, Microsoft i Amazon a subi kada un ku 1.9%.
E marka di deporte Nike a pèrdè 2.7% di su balor riba merkado di bolsa. E marka a mira su benta subi den último kuartal, pero e ganashi si tabata bou di basta preshon. E kompania tin un stòk muchu grandi ainda i mester duna hopi deskuento pa deshasí di e stòknan grandi ku tin wardá ainda. Segun analistanan di Wall Street ta promé biaha den 3 aña ku Nike no ta kumpli ku espektativanan.
Entrevista ku Tony Sherman tokante E Forsa Bou Di Mi Alanan, un interpretashon di The Wind Beneath My Wings di Bette Midler ku el a graba ku su ruman Kenneth.
Dolfein tambe ta subi nan tono di stèm ora nan ta komuniká ku nan yunan. Asina investigadónan di Woods Hole Oceanographic Institution na Massachusetts a konkluí despues di opservá 19 ehemplar femenino durante 30 aña den naturalesa pegá ku Florida.
Meskos ku serka hende, dolfein su tono lo ta subi ora nan ta komuniká ku nan yunan. Tambe nan ta imitá nan yunan ku nan stèm òf ripití nan. A opservá e mamanan tantu den serkania komo apartá di e yunan pa yega na e konklushon aki. A usa ekipamentu spesial pa midi e vários sonidonan ku e animalnan ta produsí. Na e mamanan tabatin asina yamá tags pegá pa registrá sonido i movementu.
E investigashon ta interesante pero no ta aklará dikon hende, i aparentemente dolfein tambe, ta subi nan tono di stèm ora nan ta papia ku baby chikitu. Te asina leu ta sospechá ku ta asin’aki mayornan lo ta sinti ku nan mester siña nan yunan papia dor di kopia nan tono mas tantu posibel. E investigashon ta publiká den e korant The Guardian.
Madonna ya no ta interná mas na hospital. Segun BBC News e artista di 64 aña di edat ta na kas i ta sinti’é un poko mihó despues di tabata interná for di djasabra pa un infekshon bakterial. Ki tipo di bakteria no ta konosí.
Segun medionan Merikano djasabra a transportá Madonna ku urgensha pa hospital despues ku asistentenan a hañ’é for di konosementu.
Manera nos a informá ayera e artista tabatin plannan basta avansá pa un gira mundial entrante 15 di yüli, pero esaki ta anulá. Durante e gira aki titulá Madonna: The Celebration Tour Madonna lo a selebrá su 40 aña den show business.
Na algun siudat chikitu pegá ku Paris a implementá un toke de keda entrante 9or di anochi te 6or di mainta. Esaki siguiendo disturbionan ku a lanta kabes despues ku un agente polisial a tira un hóben di 17 aña ku konsekuensha fatal. Durante un marcha di protesta emoshonnan a subi resultando den basta destrukshon na entre otro transporte públiko. Polis a mobilisá 40 mil agente pa mantené òrdu awe nochi den kayanan di Paris.
E tiramentu riba e hóben a sigui un pèrsiguishon kaminda e tabata kondusí un outo na velosidat haltu, pasando dor di lus kòrá i kometiendo vários otro infrakshon di tráfiko. E hóben lo a ninga vários òrdu pa para e vehíkulo i a te asta kore subi asera pa hui for di polis. Un dado momento e outo lo a para i agentenan a duna òrdu pa paga e motor. Ora e hóben a hasi un intento pa kore bai un di e agentenan a tira riba dje ku konsekuensha fatal.
Ministerio públiko ta investigando e kaso pa determiná si ta trata di homisidio. E kaso a lanta basta konsternashon na Fransia.
