Un hurado di korte na Merka ta tene èks presidente Donald Trump responsabel pa abusu seksual i difamashon den un kaso entamá pa e eskritor E. Jean Carroll. Alabes e hurado no ta ten’é responsabel pa violashon, manera e dama a akus’é. Carroll tin ku risibí segun e hurado un kompensashon di 5 mion dòler.
E hurado a argumentá ku e echo ku Trump a hasi bofon di e akusashonnan públikamente den un video a hasi daño na e dama su reputashon. Segun e eskritor Trump lo a viol’é den añanan 90 den un espasio pa kambia paña. Siman pasá dos otro dama a duna testimonio ku Trump lo a mishi ku nan di forma inapropiá. Trump ta hibando un kampaña di momentu pa pastisipá den elekshon pa presidensia di Merka atrobe.
E emisora públiko Hulandes NOS a trese su koresponsal na Rusia Iris de Graaf bèk Hulanda. Esaki pa motibunan di siguridat, di akuerdo ku NOS den un komunikado djaluna. E trabounan i reportahenan mester sigui tuma lugá for di Hulanda.
Aparentemente tabatin vários kaso di intimidashon kontra e reportero ku tabata traha na Moskú. Na e aeropuerto di e kapital di Rusia outoridatnan a interog’é basta largu riba e Korte di Hustisia Internashonal na Den Haag. Segun NOS dia pa dia ta mas difísil pa kubri e konflikto harmá entre Rusia i Ukrania.
Asina Rusia a adaptá vários lei ku ta regardá kobertura di e konflikto i tambe reporteronan ta kore riesgo di bai será pa bida largu. Algu komparabel a pasa ku e reportero pa The Wall Street Journal Evan Gershkovich. E ta detené for di 29 di mart riba sospecho di spionage.
E otro korespondiente di NOS Geert Koerkamp ta na Rusia ainda pero te asina leu no a hañ’é konfrontá ku e mesun problemanan, pero dado kaso e tambe mester bandoná Rusia, tur kos ta prepará pa esei.
E kiebro ku rapper Ye, anteriormente konosí komo Kanye West, a kosta e kompania Aleman Adidas entretantu 400 mion euro den e promé kuartal di e aña aki. E kompania a anulá e kontrakt ku Ye den òktober despues ku e rapper a publiká mensahenan antisemítiko riba social media, esta mensahenan ku ta buta hudiunan den un lus negativo.
Ye a yuda Adidas introdusí e modelo di sapatu Yeezy. Dor ku e kompania a kita e modelo aki for di merkado el a mira su resultado baha den e promé kuartal ku un par di sentenar di mion na Merka, China i Oropa. Adidas ta rekonosé ku e pèrdida a hasi daño na e kompania.
Segun e atministrashon di Adidas tin un kantidat di Yeezy na un balor total di 1200 mion euro den e kompania su magazeinnan. E problema ta ku Adidas no por bende esakinan sin paga Ye un kompensashon. Adidas no por i no ke adaptá e modelo tampoko i eliminashon di e kantidat enorme di sapatunan ta iresponsabel for di un punto di bista medioambiental.
E pèrdida klomo konsekuensha direkto di e kiebro ku Ye ta bai kosta Adidas segun kálkulonan 500 mion euro. Adidas ta raportá den euro ya ku e ta di orígen Aleman. Esei ta alabes e motibu dikon e komentario di Ye riba hudiu ta trese un karga èkstra pisá pa e kompania.
No opstante e pèrdida riba Yeezy, Adidas a logra tòg un resultado operashonal positivo di 60 mion euro den e promé kuartal di e aña aki. P’esei e impase ku rapper Ye no a afektá e akshonnan di e kompania riba merkado di akshon.
World Health Organisation no ta konsiderá e pandemia di Covid-19 mas komo un situashon di emergensha. Tres aña pasá a anunsiá e kódigo di alarma mas haltu, pero e fase ey a pasa. Danki na entre otro bakunashon por a tene e situashon bou di kòntròl. Pa e anunsio ofisial di WHO, klek aki.
Kada tres luna ekspertonan tabata evaluá e situashon pa despues raportá na presidente Tedros Adhanom Ghebreyesus, ku tin e outoridat pa baha e estado di emergensha na un nivel mas abou. Den yanüari ainda WHO tabata konsiderá e pandemia un situashon di preokupashon indikando ku si mester baha e nivel di emergensha, esaki mester tuma lugá paso a paso.
Durante un diskurso Ghebreyesus a indiká ku no ta solamente un selebrashon, pero tambe un momento di reflekshon pasobra ta algu ku por pasa atrobe i nos mester ta prepará. Dado ku e bahamentu di nivel di emergensha no ta nifiká mesora fin ofisial di e pandemia, ainda tin programanan di bakunashon andando.
Segun sifranan ofisial un poko ménos di 7 mion persona a muri dor di Covid-19, pero tin sospecho ku por ta trata di mas hende, esta 16.6 mion. Tambe tin esnan ku a fayesé dor di e efektonan negativo di e pandemia riba kuido den vários pais. Durante e pik di e pandemia den yanüari 2021 alrededor di 100 mil persona tabata muri semanalmente.
WHO a finalisá e anunsio ku 7 rekomendashon:
Paisnan mester saka lès for di e pandemia i prepará pa futuro insidensianan ku medidanan pa evitá pániko i negligensha.
Mester integrá bakunashon kontra Covid-19 den programanan koriente di bakunashon riba nivel lokal.
Mester kompilá tur informashon disponibel relashoná ku organismonan ku ta afektá nos sistema respiratorio pa krea mas konsientisashon.
Paisnan mester ta prepará den sentido legislativo pa tuma kontramedidanan na tempu ora esaki ta nesesario.
Mester sigui dialogá ku komunidatnan i nan lidernan pa garantisá koperashon i komunikashon pa hasi e respektivo komunidatnan mas fuerte, resiliente i inklusivo pa formulá programanan di maneho efisiente.
Alivio di medidanan relashoná ku biahe mester kontinuá, pero teniendo kuenta ku riesgonan ku por lanta kabes.
Mester sigui sostené investigashon ku ta mehorá bakuna ku ta limitá transmishon i ku por apliká integralmente sin riesgo.
E presidentenan di e kompanianan OpenAI, Google, Anthropic i Microsoft a hasi un bishita na Kas Blanku kaminda a papia ku visepresidente Harris riba nan responsabilidat pa ku desaroyo di inteligensha artifisial (AI). Segun Kas Blanku e reunion su meta ta pa stimulá desaroyo responsabel i étiko riba tereno di AI. Tambe a papia riba algun akshon ku pronto ta bai tuma lugá.
Asina a palabrá ku ta bai invertí 140 mion dòler den konstrukshon di 7 sentro di investigashon di AI. Tambe a akordá ku kompanianan lo duna akseso na nan modelonan pa un investigashon públiko durante e konferensha di hackers Defcon ku ta bai tuma lugá den ougùstùs.
Tambe Kas Blanku ta bai traha riba regulashon pa desaroyo di inteligensha artifisial tuma lugá di un forma responsabel. Otro siman Union Oropeo tambe ta bai trata e tema aki integralmente.
Senaristanan, esta screen writers, di televishon i pelíkula na Hollywood a buta trabou abou masivamente. Nan ta demandá mas sèn di studionan grandi i servisionan di streaming. Na total ta trata di 11500 eskritor di akuerdo ku The New York Times.
Nan no ta di akuerdo ku e pago ku nan ta risibí di studionan grandi manera Universal i Paramount i servisionan di streaming manera Netflix i Amazon. Entretantu ya lo a ofresé un pago mas haltu, pero e sindikato Writer’s Guild of America (WGA) no a aseptá e ofèrta.
Partikularmente talkshows ta e promé programanan ku ta afektá dor di e wèlga. Probablemente mester anulá e shownan di Jimmy Fallon, Stephen Colbert i kisas asta Saturday Night Live. Segun e presentadó Seth Meyers, ku tambe ta miembro di e sindikato, a bisa den un deklarashon ku nan no a tuma e paso aki di un dia pa otro.
Pa mundu di sine e impakto ta ménos grandi, ounke e wèlga ta nifiká si ku sierto produkshon ta haña retraso. I si e wèlga pèrsistí mas largu e proyektonan mester warda mas largu. E wèlga ta tumando lugá partikularmente na New York i Los Angeles, kaminda mayoria kompania di entertainment ta operá.
Delaster biaha ku tabatin un wèlga komparabel tabata den 2007. E wèlga ey a dura 100 dia i a kosta e industria mas di 2 mil mion dòler.
NASA a publiká un video nobo ku un splikashon amplio riba kon asina yamá buraku pretu ta yega na nan tamaño. E video ta forma parti di e serie di kontenido ‘Black Hole Week‘, kaminda NASA ta dediká vários artíkulo riba e fenómeno.
Kiko ta un buraku pretu?
Nan ta en prinsipio materia, un opheto ku un forsa di gravedat asina fuerte ku nada ta skap’é, ni lus.
Nan por apsorbé tur loke ta materia, inkluso strea i planeta.
Un buraku pretu por surgi na momentu ku un strea muri siguí pa un imploshon.
Den e video di NASA ta kompará nos propio solo ku otro burakunan pretu ya konosí. Tambe ta duna um impreshon di e buraku pretu den sentro di e konosido Milky Way. Aña pasá sientífikonan a logra kapta imágen di e sentro ku a haña e nòmber Sagittarius A*.
E opheto mas grandi ku ta pasa den e video ta TON 618, un di e burakunan pretu mas grandi den universo. E ta keda na un distansha di 10 mil mion aña di lus for di nos i ta pisa segun kálkulonan mas o ménos 66 mil mion solo manera esun di nos. E tamaño di TON 618 ta kalkulá na mas o ménos 43 biaha esun di nos sistema solar i dos biaha e tamaño di Milky Way.
E imágennan i informashon ku ta bin dilanti den e publikashonnan di NASA den ‘Black Hole week’ ta impreshonante. Si e video no ta habri, klek aki.
Na Kenia a ofisialmente akusá e lider di sekta Paul Mackenzie di a instigá su siguidónan pa yuna te na morto. Por lo ménos 109 persona a pèrdè nan bida dor di keda sin kome riba òrdu di Mackenzie. Sinembargo tin 400 persona mas disparsé. Paul Mackenzie a paresé den korte huntu ku 17 otro akusado ayera na e kapital Mumbasa di akuerdo ku agensia di prensa Reuters.
E suseso a tuma lugá na e siudat Malindi kaminda su Good News International Church tabata operá. E tabata akusá den pasado kaba pa entre otro negligensha i radikalisashon di su siguidónan.
Mackenzie lo a pronóstiká ku mundu tabata bai kaba riba 15 di aprel último i a kombensé su siguidónan pa tuma nan propio bida pa asina nan yega shelu promé ku kualke otro hende.
Outoridatnan a haña sigur 101 kurpa kaba den un graf masivo pegá ku Malindi. Mayoria di e víktimanan ta mucha ku a muri di hamber. A bin haña 8 di nan na bida, pero nan tabata asina debilitá ku nan no a sobrebibí. Te ainda ta buskando kurpa na e sitio.
E miedu ta real. Despues di kaida di e banko Merikano First Republic Bank e tenshon den e mundu bankario ta enorme den último dianan. Mart ya tabata un luna ku notisia preokupante ora ku vários otro banko a haña nan den problema. Ta preludio di un krisis bankario nobo manera nos a mira den 2008? For di e tempu ey mundu finansiero ta kouteloso ku bankonan ku ta tumba.
Ora ku tantu Silicon Valley Bank komo Signature Bank a hera di bati bankarota ya tur tipo di alarma a kuminsá bati serka polítikonan, supervisornan i kompania. Pa kolmo a sigui e kaida di e banko Suiso Credit Suisse, loke a alimentá e preokupashon ku e kaida di un par di banko por resultá den un efekto dominó den ekonomia.
Pa bin bèk riba First Republic Bank, esaki ta forma parti awor di JP Morgan ku a bin dilanti pa salba e banko despues di e bank run siman pasá ku a evaporá mitar di e kapital di First Republic.
Na total JP Morgan a paga 10 mil mion dòler pa First Republic. Pero ta keda e pregunta si First Republic ta e delaster banko ku nos ta mira bati bankarota, pasó riba merkado di akshon en todo kaso kos no ta parse di ta move den un direkshon positivo.
A detené por lo ménos 132 miembro di e organisashon di mafia ‘Ndrangheta na Italia durante un akshon polisial internashonal. ‘Ndrangheta ta un organisashon ku ta operá for di e parti mas sùit di Italia. Sigur dos di e detenidonan ta persona ku ta riba e lista di personanan mas buská.
Mas di 2770 agente a partisipá den e akshon ku a tuma lugá den 10 pais repartí over di Oropa i Suramérika. Mayoria sospechoso a keda detené na Italia. E operashon ta andando ainda i ta trata di narkotráfiko i labamentu di plaka.
Tantu Europol komo Eurojust, e organisashonnan ku a kordiná e akshon, ta papia di un gòlpi duru pa kriminalidat organisá. Un par di siman pasá tabatin un akshon komparabel den nos hemisfério ku a resultá entre otro den detenshon di un miembro di NLS i un kolaboradó di Riduan Taghi na Hulanda.
Merka mester subi su plafònt di debe pronto. E minister di finansa Merikano Janet Yellen ta premirá ku kisas e pais no ta bai por kumpli ku su debenan finansiero entrante yüni. Kiko ta pasando?
What / Where
Kada tantu aña Kongreso Merikano ta determiná e plafònt di debe di e pais, esta kuantu sèn e pais ta pèrmití di fia. E lei aktual na Merka ta stipulá ku Merka no tin mag di tin un debe di estado di mas di 31.4 bion dòler. Pa bo tin un idea: 1 bion (ku b) ta un suma di sigur 12 sifra.
De echo Merka a yega na e límite aki kaba for di yanüari, pero kongreso a tuma medida pa gobièrnu por a sigui invertí kapital. E departamentu di Finansa no por pronostiká mas kuantu tempu Merka por sigui hasi esaki sin subi e plafònt di debe. Pero tur kos ta mustra ku pronto Merka lo no disponé di kapital. Pa e motibu ey mester bai tuma medida pronto di akuerdo ku e departamentu di finansa.
Si no subi e plafònt di debe e konsekuenshanan por ta hopi ferfelu. Ámtenar no por kobra i ònderstant tampoko por wòrdu pagá. Aparte di esei e merkado finansiero na Merka ta di importansia vital pa ekonomia mundial pasó Merka ta un di e paisnan ku ta invertí mas den otro pais. Si kos bira pèrtá na Merka esaki tin un konsekuensha direkto pues pa e paisnan ku ta dependé di e invershonnan aki i pa komèrsio en general.
Nunka den historia kos a yega asina leu ku e pais no por kumpli ku su debernan finansiero pasó for di añanan 60 e pais a subi e plafònt na por lo ménos 80 okashon.
Who / When
Presidente Joe Biden ta reuní riba 9 di mei ku diferente lider di kongreso pa trata e asuntu, pasó e subimentu di e plafònt di debe semper ta fuente di konflikto polítiko den e pais.
E frakshon demokrátiko ta pidiendo un oumento di e plafònt pa algun tempu kaba, pero di momentu ta e republikanonan tin un mayoria den parlamentu Merikano, e asina yamá House of Representatives. E republikanonan no ta aseptá oumento di e plafònt di debe sin medidanan di ousteridat, esta ekonomisashon riba sierto gastu. I Biden di otro banda ta ninga di hasi esaki sino e no por kumpli ku su plan di maneho.
Why
E mayor parti di gastunan di gobièrnu ta bai na defensa. Si ekonomisá riba esaki tin konsekuensha direkto pa Merka su intervenshon den konfliktonan rònt mundu. Alrededor di 3,5% di e produkto nashonal di Merka ta bai na gastunan di defensa.
Siguiendo e éksito di e serie rondó di e asesino di serie Jeffrey Dahmer, Netflix ta bai traha un serie riba e rumannan Lyle i Erik Menéndez. Nan a keda kondená pa bida largu den 1996 pa asesinato di nan mayornan.
Ta trata di e di dos parti di e kolekshon di serie Monsters. E promé a trata pues e ya menshoná Jeffrey Dahmer, por sierto un di e serienan mas eksitoso den historia di Netflix banda di Stranger Things i Squid Game.
The Lyle and Erik Menéndez Story tambe ta dirigí pa Ryan Murphy, kende segun e revista Deadline lo tabatin kontakto eksklusivo ku e rumannan ku a tira nan mayornan mata den 1989. Lyle tabatin 21 i Erik 19 aña na e momentu ey.
Den novèmber Netflix a disidí kontinuá ku por lo ménos dos kolekshon mas di Monsters. The Lyle and Erik Menéndez Story tin ku sali otro aña.
